بۆق یەكێكە لە گیاندارە وشكاوییەكان، لە مرۆڤەوە زۆر نزیكە و شێوەیەكی قێزەوەنی هەیە، لە هەندێك لە كۆمەڵگەكان گۆشتی بۆق دەخورێت، جیا لەوە بەجۆرێك وەسفی دەكەن كە سوودی زۆرە، لە فڕەنسا ئەو گۆشتە رەواجی هەیە و خەڵكەكە دەیخۆن، بەتایبەتی قاچەكانی، بەڵام بۆچی؟
چیرۆكی بۆق و فڕەنسییەكان بۆ سەتەی 12ی زاینی دەگەڕێتەوە، ئەوكاتەی قەشەكان گۆشتێكی زۆریان دەخوارد و تەواو قەڵەو بووبوون، بۆیە دەسەڵاتدارانی كڵێسە هاتنە ناو بابەتەكە و كڵێسای كاسۆلیكی فڕەنسا پرۆتۆكۆلێكی ئاینی دەركرد و خواردنی گۆشتی لە قەشەكان قەدەغە كرد، بەڵام ئەوان زیرەك بوون، بەشێوەیەك خۆیان لەو پرۆتۆكۆلە دزییەوە و وایان لەقەڵەم دا كە بۆق سەر بە خێزانی وشكاوییەكانە، ئەویش جۆرێكە لە ماسی.
بەو شێوەیە دەستیان بە خواردنی گۆشتی بۆق كرد، دوای ئەوە خەڵكەكەیش كە هەژار بوون و توانای كڕینی گۆشتیان نەبوو، لەسەر بنەمای ئەو پرۆتۆكۆلەی كڵێسای فڕەنسی پەنایان بۆ خواردنی گۆشتی بۆق برد، وەك ماڵپەڕی " matadornetwork "، باسی كردووە.
یارمەتی كەمكردنەوەی كێش دەدات و چێژی هاوشێوەی گۆشتی مریشكە
لە ماوەی شەڕی 100 ساڵەیان لەگەڵ بەریتانیا، فڕەنسییەكان تەنیا گۆشتی بۆق و لوولپێچ و چەلاوی پیازیان لا هەبوو كە بیخۆن، بۆیە فڕەنسییەكان بە حەزی خۆیان نەبووە كە روویان لە خواردنی بۆق كردووە، بەڵام دوای ئەوە بووە ژەمێكی بەتام و بڵاوی ئەوان، بەتایبەتی قاچەكانی، كە لە زۆرینەی چێشتخانەكانی پاریس پێشكەیش دەكرێت، هەر ئەوەیش وای كرد بەریتانییەكان لە سەتەی 14، ناسناوی "بۆقەكان"، بدەنە پاڵ فڕەنسییەكان، وەك جۆرێك لە گاڵتەكردن.
بەپێی ئامارەكان، ساڵانە فڕەنسییەكان 80 ملیۆن بۆق دەخۆن، واتە 160 ملیۆن قاچی بۆق، جۆرە خواردنێكیان هەیە بەناوی "cuisses de grenouille"، بووەتە هەڕەشە لەسەر بۆقەكانی فڕەنسا، تا ئاستێك لە 1977، وەزارەتی كشتوكاڵی فڕەنسی راوی گیاندارە وشكاوییەكانی قەدەغە كرد، بەشێوەیەك راوچییەكان دەیانتوانی ساڵانە تەنیا لە ماوەی 15 رۆژ راوی بكەن، لەوكاتی یەكێتی سۆڤیەت یەكێك بوو لە گەورەترین سەرچاوەكانی بۆق.
هەر بۆ رێگرتن لە لەناوچوونی وشكاوییەكان، حكوومەتی فڕەنسا لە 1980، قەدەغەی راوی بۆقی كرد، جیا لەوە هەڵمەتێكی دەست پێ كرد بۆ پاراستنی بۆق، بەتایبەتی دەبێت بۆقێك كێشی 125 گرام بێت، تەنیا قاچەكانی بخورێت، ئەوەیش لەلایەن بەرگریكاران لە مافی ئاژڵ بەتوندی هێرشی كرایە سەر.
لەگەڵ ئەوەیش فڕەنسییەكان دەستبەرداری ئەو ژەمە خۆشەیان نەبوون، پەنایان بۆ هاوردەكردنی بۆق لە ئیندۆنۆسیا و یۆنان و تایلاند و ئەلبانیا برد، وەك ماڵپەڕی " itsfoodtastic "، باسی كردووە، ئەمڕۆیش چێشتلێنەرە ئەمەریكییەكان بۆقی گەورەیان لا گونجاوە كە كێشەكەی بگاتە 500 گرام، هەروەها فڕەنسا تیرەی دووڕەكی بۆق لە ژمارەیەك وڵاتی ئاسیا هاوردە دەكەن.
رەنگە ژەمێكی سەرنجراكێش نەبێت و بۆ زۆرێك قێزەوەن بێت، بەڵام باسی دەكرێت كە قاچەكانی بۆق سوودی بۆ تەندروستی هەیە، سەرەتا پێویستە بزانیت كە ژەمێكی سەلامەتە، چونكە بۆق تەنیا لەناو ئاوی پاكدا دەژیت، بۆیە گۆشتەكەی دۆستی ژینگەیە و ژەهر و مادەی زیانبەخشی تیادا نییە، قاچی بۆق رێژەیەكی زۆر كەم كالۆری تیادایە، بۆیە بۆ ئەوانەی دەیانەوێت كێشیان كەم بكەنەوە گونجاوە، چێژەكەیشی هاوشێوەی گۆشتی مریشكە، قاچی بۆق كۆلیسترۆلی نزمە، مادەی فسفۆڕی تیادایە كە بۆ ئێسك گرنگە، جیا لەوەی سیلینیۆمی تیادایە، كە یارمەتی كەمكردنەوەی هەوكردن دەدات، هەروها گۆشتی بۆق بە ئاسن و كالیسیۆم و ڤیتامینەكانی سی و ئی و دی دەوڵەمەندە.
چێشتخانەی فڕەنسی، یەكێكە لە چێشتخانە ناودار و گرانبەهاكانی دنیا، چەندان جۆر خواردنی چێژبەخش و شیرینی بەناوبانگی تیادایە، كە خەڵكێكی زۆر حەزیان لێیە تاقی بكەنەوە و چێژی بكەن، یەكێك لە ژەمە گرنگ و بەناوبانگەكانی چێشتخانەكانی پاریس، ژەمی قاچی بۆقە، رەنگە دوای خواردنی، بۆچوونت بەرانبەر بە بۆق و گۆشتەكەی بگۆڕێت، فڕەنسییەكان دەیخۆن، لە زۆرێك لە چێشتخانەكانیشیان هەیە و ژەمێكی بەناوبانگیشە.