دوو کچێن باژێرێ دهۆکێ د چارچوڤێ ڤەستیڤالەکا زانستی ل دهوکێ جورە سابونەکا خومالی دروستکریە کو بکارئینانا وێ ژبلی بێهنەکا خوش هەڤدەم چوو تشتەکێ مری لسەر پیستێ لەشی ناهێلیت.
دیمەن ئیسماعیل، ئئک ژ وان دوو کچایە بۆ "وشە" گۆت: (وەکو قوتابیەک ل ئامادەیا شالین مە پشکداری د ڤەستیڤالەکا زانستی کریە، گروپێ مە سابونا خومالی دروستکریە کو پێکهاتەیا سەرەکی یا وێ ژ زەیتا زەیتونان و قەهوێ پێکدهێت ژبەرکو ئەڤ یەک مفایەکێ زێدە باش هەیە بو نەهێلانا تشتێ مری ل سەر پیستی، ئەڤە ژبلی وێ یەکێ کو سابونا مە بێهنەکا خوش هەیە و رەنگەکێ جوان هەیە و کەفەکا باش ژی ددەت).
زێدەتر گوت: (ڤەکرنا ڤان جورە پێشانگەهان بۆ قوتابیان گرنکیەکا زۆر هەیە ژبەرکو ژلایەکێ ڤە قوتابی هندەکێ ژ کەشوهەوا و روتین و ژینگەها خواندنێ دوردکەڤیت، ژلایەکێ دنڤە شیانێن وان دهێنە بەرچاڤکرن و داهێنانان دکەن).
قوتابیا ناڤبری دیارکر ژی کو ئەگەر هەڤکاریا وان بهێتەکرن دشێن چێکرنا سابونێ بکەن پروژە و گۆت ژی: (پێدڤی یە مفا ژ وان کار و پروژە و داهێنانان بهێتەکرن کو ل کوردستانێ د هێنەچێکرن، داکو هەند ببیتە هاندە بۆ قوتابی و داهێنانکارێن مە، هەند ژی بەرهەمێ خومالی بهێتە دروستکرن و بکەڤیتە بازاڕی).