كونسوڵی ئەمەریكا لە هەرێمی كوردستان سەردانی سەرۆكی هەرێمی كوردستان دەكات، لە گفتوگۆی لەگەڵ نێچیرڤان بارزانی، پاڵپشتیی وڵاتەكەی بۆ گفتوگۆی نێوان پارتی و یەكێتـی دووپات دەكاتەوە.
ئەمڕۆ چوارشەم یەكی شوبات، نێچیرڤان بارزانی سەرۆكی هەرێمی كوردستان، لەگەڵ ئیرڤن هێكس جوونیەر كونسوڵی گشتیی ئەمەریكا لە هەرێمی كوردستان كۆ بووەوە.
لە كۆبوونەوەكەدا دواین پێشهاتە سیاسییەكانی هەرێمی كوردستان و دیدار و كۆبوونەوەكانی پارتی دیموكراتی كوردستان و یەكێتیی نیشتمانیی كوردستان تاوتوێ كران. لەمبارەیەوە كونسوڵی گشتیی ئەمەریكا، پێشوازی و پشتیوانیی وڵاتەكەی بۆ گفتوگۆ و هەوڵەكانی چارەسەركردنی كێشەكانی هەردوولا پێشان دا و دووپاتی كردەوە، ئەمەریكا بە بایەخەوە لە پێوەندییەكانی لەگەڵ هەرێمی كوردستان دەڕوانێت.
پرۆسەی چاكسازی و ڕێكخستنەوەی پێشمەرگە، تەوەرێكی تری كۆبوونەوەكە بوو، تێیدا سەرۆك نێچیرڤان بارزانی دووپاتی لە بەردەوامی و گرنگیی سەرخستنی پرۆسەكە كردەوە، سوپاسی هاوكاری و پشتگیریی ئەمەریكای لەمبارەیەوە كرد. لای خۆیەوە كونسوڵی گشتیی ئەمەریكا، بایەخ و گرنگیپێدانی وڵاتەكەی بە پرۆسەكە و خێراتركردنی خستە ڕوو.
هەر لە كۆبوونەوەكەدا كێشەكانی هەولێر ـ بەغدا، كاركردن بۆ سەردانی شاندێكی بازرگانیی ئەمەریكی بۆ هەرێمی كوردستان، پرسی مافەكانی مرۆڤ، ئازادیی ڕۆژنامەوانی و ڕادەبڕین و چەند بابەتێكی تری جێی بایەخی هاوبەش، تاوتوێ كران.