ئەژی ئەمین یاریدەدەری راوێژکاری ئەنجوومەنی ئاسایش بەبۆنەی سەری ساڵی نوێی كوردی، پەیامێكی بڵاو كردەوە و پیرۆزبایی خۆی ئاراستەی هێزە تەناهییە فەرمییەكانی كوردستان كرد و هاوكات ئاماژەی بەوەیش دا كە پێویستە ئەمساڵ هەڵبژاردن لە كوردستان بکرێت و چیتر هەڵبژاردن بەهۆی ترس و شكستی تاقمێك دوانەخرێت و ئەزموونی هەرێمی كوردستان لەكەدار نەکرێ.
لە پەیامەكەی ئەژی ئەمیندا هاتووە، بەبۆنەی هاتنەوەی نەورۆز و سەری ساڵی کوردی، پیرۆزبایی لە تەواوی کوردانی هەرچوار پارچەی کوردستان دەکەم بە تایبەتی لە کەسوکاری سەربەرزی شەهیدان و پێشمەرگە دلێرەکان، زیندانیانی سیاسی و کارمەندو سەربازە ونەکانی ئەنجوومەنی ئاسایشی هەرێمی کوردستان و تەواوی هێزە فەرمییەکانی کوردستان.
لە درێژەی پەیامەكەیدا ئەمین دەڵێ بەپێویستی دەزانین پشتیوانی خۆمان دەرببڕین بۆ راستکردنەوەی دۆخی هەرێمی کوردستان، ئەمەش بە بەڕێوەچوونی هەڵبژاردنی پەرلەمانی کوردستان لە ئەمساڵدا. دووپاتیشی كردەوە کە نابێ چیتر هەڵبژاردن بەهۆی ترس و شکستی تاقمێک دوابخرێت و ئەزموونی هەرێمی کوردستان لەکەدار بکرێ.
"لەم نەورۆزە بەڵێن بە هاوسەنگەر و خوشک و براکانمان لە حزبی شەهیدان دەدەین کە کۆڵنادەین بۆ راستکردنەوەی دۆخی یەکێتی و بەرپاکردنی ئاشتەوایی لەگەڵ بنکەو جەماوەری حیزبەکەی سەرۆک مام جەلال"لە درێژەی پەیامەكەی ئەژی ئەمیندا هاتووە.
ئەژی ئەمین زیاتر نووسیوویەتی، ئەوەی ئێستە هەیە تاقمێک لە حزبی شەهیدان ڕۆژانە خەریکی پەلاماری کچ و ژن و کادرانی دڵسۆزی یەکێتی و داودەزگا فەرمیەکانی سلێمانین، جگە لە تاڵانی بانکەکان و فرۆشتنی خاک و زەویوزار، هیچیتر ناکەن. بەڵام دڵنیاتان دەکەمەوە ئەو دۆخە وەکو ئێستا نامێنێتەوە. داوای ئارامگرتن و دانبەخۆداگرتن لە تەواوی کارمەند و ئەفسەرانی دەزگا ئەمنییە فەرمییەکان دەکەین و دڵنیابن ئەو تاکڕەوی و یاساشکێنییە بەردەوام نابێ، چونکە یەکێتی حیزبی هەزاران شەهیدو سەرکردەیە نەک شێتخانە.
ئەژی ئەمین بەرپرسی دەزگای زانیاریی پێشوو و یاریدەدەری سەرۆکی ئەنجوومەنی ئاسایشی نەتەوەیی کوردستان، بەهۆی ململانێ توندەکانی ناوخۆی یەکێتی سلێمانی جێهێشتووە و کارەکانی لە هەولێر دەکات.
ئەو پێشتر پشتیوانی بافڵ تاڵەبانی بوو بۆ گۆڕانکاریی، بەڵام دواتر بافڵ لێی هەڵگەڕایەوە و کێشە کەوتە نێوانیان، تا چەکدارەکانی هەڵیانکوتایە سەر منداڵەکانی لە سلێمانی.