سەرچاوەیەكی تەناهی لە ناوچەی سەوزی بەغدا ئەمڕۆ رای گەیاندووە، هۆتێلی رەشید لە ناوچەی سەوز، ئاگری گرت و تەواوی نێردە دیپلۆماسییەكانی وڵاتان كە تێیدا بوون، رزگار كران.
پێگەی "
شەفەق نیوز" ئەمڕۆ چوارشەم 27ی ئەیلوول بڵاوی كردووەتەوە، بەپێی سەرچاوە تەناهییەكە، هۆتێلی رەشید كەوتووەتە ناوەڕاستی بەغدا و ناوچەی سەوز، چێشخانەی هۆتێلەكە ئاگری گرت و تیمەكانی رزگاركەر، ئەوانەی لەوێ بوون كە بەشێكیان لە نێردە دیپلۆماییەكانی وڵاتان بوون، رزگاریان كردوون.
ئاماژە دراوە كە ئاگركەوتنەوەكە مامناوەندی بووە و بۆیە دوای كۆنترۆڵكردنی ئاگرەكە، تەواوی ئەوانەی لەوێ دەمانەوە، گەڕێنرانەوە ژوورەكانی خۆیان.
هۆتێلی رەشید كە دەكەوێتە ناوەڕاستی ناوچەی سەوز، ئەو ناوچەیەی زۆرترین پاسەوانیی لێ دەكرێت، چونكە بارەگای پەرلەمان و ژمارەیەكی زۆری باڵەخانەكانی نێرردەی دیپلۆماسیی وڵاتان و باڵوێزخانەكان لەوێ هەڵكەوتوون.
لێكۆڵینەوە لە رووداوەكە دەستی پێ كردووە.