پەكەكە ئەو گرووپە چەكدارە نایاساییەی دەیان ساڵە هاتووەتە هەرێمی كوردستان و چالاكیی سیاسی و چەكداری دەكات، ئەگەرچی ئەجیندایەكی گوماناوی هەیە، بەڵام هیچ پێزانینی بەرانبەر بە خاك و نیشتمان و پێشمەرگەی كوردستان نییە و بەردەوام دژایەتیی حكوومەتی هەرێم دەكات، بەرانبەر بە هاووڵاتییانی كاری دوژمنان جێبەجێ دەكات.
لەبارەی بوون و ئامانجەكانی ئەو گرووپە رێبوار كەلاری، چاودێری سیاسی بە "وشە"ی گوت، پەكەكە گرووپێكی مافیاییە و كاری تێكدانی هەرێمی كوردستان بووە، بۆ ئەوە دروست كراوە لە كورد بدات و داردەستی دوژمنانە و چۆن بیانەوێت هەڵی دەسووڕێنن، ئەوەی لای گرنگ نەبێت كورد و كوردستانە و بۆ ئەوە دروست كراوە كوردستان رادەستی دوژمنان بكات، كاری ئەوەیە كوردستان بەرەو وێرانە ببات، بۆیەش پەلاماری پێشمەرگەی لەناو خاكی كوردستان دا كە پارێزەری خاك و ئاڵا و نیشتمانە.
روونی كردەوە، پەكەكە زیاتر لە 40 ساڵە خەبات دەكات، بەڵام تا ئێستە جگە لە بەكوشتدانی كۆمەڵێك گەنجی دڵپاك و هەژار كورد بە هیچ نەگەیشتووە، كە بەوە تێكەوتوون وا دەزانن پەكەكە خەبات بۆ گەلی كورد دەكات، ئاخر لەكوێ بووە 40 ساڵ خەبات بكەیت و هیچت دیار نەبێت، گوندێكی باكور و كۆڵان و ناوچەیەكت بەدەستەوە نەبێت، بۆیە پەكەكە هیچ شانازییەكی نییە.
ئەو چاودێرە سیاسییە دووپاتی كردەوە، ئەگەر پەكەكە كوردایەتی دەكات، باشترین خزمەت بیكات ئەوەیە بچێتە دەرەوەی كوردستان، چونكە ئەگەر شەڕی توركیا دەكەن، باكور باشترین شوێنە بۆیان و بۆچی ناچن لەوێ بمێننەوە، بەڵام بەشێكی كوردستانیان داگیر كردووە و رێگە نادەن خەڵكی كوردستان بچێتە ئەو ناوچانە و خەڵك دەگرن و بەزۆر دەیانكەن بە چەكدار، ئەمانە كەی هی ئەوەن پێیان بگوترێت كورد؟، لەوكاتەی كورد خاوەن رێز و رۆشبیری و رێزلێگیراوە، بۆیە پەكەكە هێزێكی نایاسایی و مەترسیدارە لەسەر خاكی هەرێمی كوردستان.
لای خۆیەوە محەمەد سەعدەدین، سەرۆكی پارتی گەشەپێدانی توركمانی بە "وشە"ی راگەیاند، شوێنی پەكەكە هەرێمی كوردستان نییە و سەرئێشەیەكی زۆری بۆ حكوومەتی هەرێمی كوردستان دروست كردووە، بەتایبەت لەسەر ئاستی پێوەندییەكان و دیپلۆماسی، كاتێك بەهۆی پەكەكەوە هەرێمی كوردستان رووبەڕووی كێشەی سیاسی و كۆمەڵایەتی بووەتەوە، بۆیە پەكەكە هیچ پێوەندییەكی بە هەرێمی كوردستانەوە نییە و هێزێكە لە دەرەوەی یاساكانی هەرێم، ئەوانەشی دەیانەوێ پاڵپشتی لە مافی هەر چین و توێژ و پێكهاتەیەك لە توركیا بكەن، دەتوانن لە ناوخۆی ئەو وڵاتە بە رێگە و خەباتی سیاسی بەشداری هەڵبژاردنەكان بكەن.
زیاتر گوتی، هەر لە راپەڕینەوە تا ئێستە پەكەكە جگە لە زیانگەیاندن و تێكدانی سەقامگیری و نائارامیی ناوچە سنوورییەكان، هیچی تری بۆ كوردستان نەبووە، مایەی ئازار و ناڕەحەتی و تێكدانی ژیان و ماڵی هاووڵاتییانی ناوچە سنوورییەكانە، سەتان گوند بەهۆی ئەوانەوە وێران بوون، لەناو خاكی هەرێمن و دژی حكوومەتی هەرێم و دامەزراوەكانی و هێزی پێشمەرگەن، لەوكاتەی هەرێم خاوەنی قەوارەیەكی دەستووری و سیاسییە و بەرژەوەندی و پێوەندی لەگەڵ وڵاتانی دراوسێدا هەیە، بۆیە نابێت پەكەكە ببێتە هۆكاری تێكدانی ئەو بەرژەوەندی و پێوەندییانە.
پێوەست بەو بابەتە خالید محەمەد، چالاكی مەدەنی بۆ "وشە" ئاماژە دەكات، شتێكی زۆر سەیرە تۆ خۆت لە هەرێمی كوردستان مێوان بیت، بەڵام هەر ئەو شوێنەی لێی دەمێنیتەوە نەك هەر وەفات بۆی نەبێت، بگرە ببیتە مایەی ئاژاوە و تێكدانی، بەهەموو شێوەیەك دژی خەڵكی كوردستان بیت، دژی ئەو حكوومەتە بیت كە كوردییە و تۆش خۆت بە كورد بزانیت.
دووپاتی كردەوە، هێزێكی داردەستی دوژمن ناتوانێت دڵسۆز و خەمخۆری خەڵك بێت، جیا لەوە ئەگەر پەكەكە دەسەڵاتی لە ناوچەیەك هەبێت، دەبێت هەرچی هەیە ببێتە شوێنكەوتەی خۆی، ئەو هیچ كەسی قبووڵ نییە خۆی نەبێت.
وشە/ تایبەت