دەمەکێ کێم بەری نوکە زەلامەکێ هەڤژینا خۆ دناڤ مال دا ل کەمپا ماملیان یا سەر ب قەزا ئاکرێ خەندقاند، پولیسێن ئاکرێ ژی ددەن دیارکرن کو بکوژ هاتە گرتن.
رێڤەبەریا پۆلیسێن ئاکرێ بو "وشە" راگەهاند کو ئەڤرۆ پولیسێن کەمپا ماملیان هاتنە ئاگەهدارکرن ب هەبوونا تاوانەکا کوشتنێ ژ جورێ خەندقاندن دناف کەمپێ دا و گوت، مەفرەزا پولیسێن کەمپا ماملیان ل سنورێ ناحیا گردەسێن ل جهێ تاوانێ ئامادەبوون و ل گەل تیما بەشێ ڤەکولینا بەلگێن تاوانا و نڤیسینگەھا نەهێلانا گونەهباریا سیپە و بنگەهێ پولیسێن گردەسێن، دەست ب ڤەکولینێ هاتەکرن ولدیف ڤەکولینێن دەستپێکی دیاربوو کو ژنەک بناڤێ (ل . م . ی) یا تەمەن ٢٩ سالی هاتیە خەندقاندن ژلایێ هەڤژینێ وێ بناڤێ ( ا . ح . ع) یێ تەمەن ٣٧ سال کو ژ ئاکنجیێن کەمپا ناڤبری نە.
زێدەتر گوت، لاشێ وێ ژنێ هاتیە رەوانەکرن بۆ پزیشکیا داد ل پارێزگەها دهوکێ ژبۆ ئەنجامدانا ڤەکولینان و دیاربوونا زانیاریان، دیسان تاوانبار ژلایێ پولیسێن کەمپا ماملیان هاتیە دەستەسەرکرن و ب فەرمانا دادوەرێ ڤەکولینا ئاکرێ لدیف بەندێ ٤٠٦ ژ یاسا سزایێن عیراقی دۆز بۆ تاوانێ هاتیە ڤەکرن ل نڤیسینگەھا نەهێلانا گونەهباریا سیپە و ڤەکولین بەردەوامە.
دهێتە زانین ئەڤە دبیتە ئێکەم حالەتێ خەندقاندنێ ئڤ سالە ل کەمپا ناڤبری کو یا تایبەتە ب روژئاڤایێ کوردستانێ ڤە.