هەواڵی كوشتن و خۆكوشتن و كێشە كۆمەڵایەتییەكان بەهۆی زۆری بڵاوكردنەوەیان، كاریگەرییەكی خراپی لەسەر دەروونی تاكی كورد دروست كردووە، دەرووناسێكیش پێی وایە، یەكێك لە هۆكارەكانی زیادبوونی ئەو رووداوانە، بایەخی راگەیاندنە بەو كێشانە.
بەپێی داتایەكی رۆژنامەی نیویۆرك تایمز، لە وڵاتانی ئەوروپا بەتایبەت ئەسكەندەناڤیا، رێژەی خۆكوشتن بەرزە و لە ئەمەریكاش رووداوەكانی كوشتن زۆرن، بەڵام میدیا لەو وڵاتانە رێیان پێ نادرێت هەموو شت بكەنە هەواڵ، ئەمەش تەنیا لەبەرئەوەی ئەو هەواڵە كاریگەریی لەسەر دەروونی گوێگر و بینەر و خوێنەر جێنەهێڵێت.
لە كوردستان كێشەی میدیا قووڵە و بۆ دانیشتووان و جیۆگرافیایەكی كەم، بێشوومار میدیا هەن، ئەم میدیایە لە كاتی رووماڵی هەواڵی مردن و كوشتن و خۆكوشتن و كێشە كۆمەڵایەتییەكاندا، هەڵمەتێكی گەورە دەكەن.
د. سامان سەبری كە پسپۆرێكی دەروونییە لە سوید، لەمبارەیەوە بە "وشە"ی گوت، میدیا لە كوردستان دەست لە هەموو كون و قوژبنێكی ژیانی مرۆڤ وەردەدات و شتی تایبەت و كەسی نەماوە، هەمووی خراوەتە سەر شاشە.
ئەو پسپۆڕە دەڵێت، لە وڵاتێكی وەك سوید رێگە نادرێت ئەو هەواڵانە بگوازرێنەوە، بەتایبەت پێویست ناكات منداڵان و گەنجان هەواڵی وا ببیستن، چونكە كاریگەریی لەسەر دەروون و عەقڵیان جێدێڵێت.
د. سامان باسی لەوەش كرد، لە كوردستان بەهۆی نەبوونی پەروەردەوە، هەموو منداڵێك مۆبایل و ئایپاتی هەیە و زۆربەی كاتیش بەدەستیانەوەیە، بەشێكی ئەمە بەهۆی بێكاری و بەتاڵیی زۆری ئەو منداڵ و گەنجانەوەیە كە حكوومەت دەرفەتی وزە سەرفكردنی بۆ نەرەخساندوون، ئەوانیش ئەو كاتە زۆرەی هەیانە بە مۆبایل و ئایپات و ئینتەرنێت بەفیڕۆی دەدەن.
ئەو دەرووناسە ئەوەشی گوت، میدیا لە كوردستان بەڕەڵا كراوە، لە كوشتنی كەسەكەوە تا سەر قەبران دەیگوازێتەوە و شتەكەیان لە بەرچاوی هەمووان ئاسایی كردووەتەوە، ئەوەش وایكردووە گەنجان ئەو شتانە بەئاسانی دووبارە بكەنەوە.
د. سامان سەبری دەڵێت: بە سەرنجدان بەو میدیایەی لە كوردستان كار دەكات، ئەوەت بۆ دەردەكەوێت "ئەوەی دوژمن نەیتوانی بەكوردی بكات، راگەیاندن كردی". چونكە كۆمەڵگەی شێواند و هەموو شتێكی تێكداوە.
بەپێی ئەو ئامارانەی لای وەزارەتی ڕۆشنبیری حكوومەتی هەرێمی كوردستان و سەندیكای رۆژنامەنووسانی كوردستانە، ژمارەی ئەو دەزگایانەی كە تا ئێستە مۆڵەتیان وەرگرتووە بریتین لە:
40 كەناڵی ئاسمانی
122كەناڵی لۆكاڵی
180 رادیۆ، 987 گۆڤار و رۆژنامە.
30 نووسینگەی كەناڵی بیانی لە هەرێمی كوردستاندا هەن
بەپێی ئاماری نافەرمی كە لای وەزارەتی رۆشنبیری ناویان تۆمار نەكراوە، تەنیا لە هەرێمی كوردستان زیاتر لە سێ هەزار و 489 پەیج و سایت هەن و هەموویان وەك دەزگای راگەیاندن رۆژانە كار دەكەن، زۆرینەیان كاریگەریی خراپیان لەسەر رای گشتی كۆمەڵگەی كوردی هەیە.
بەڕێوەبەرایەتیی پۆلیسی هەولێر لەبارەی هەواڵی كوشتن و ئەو رووداوانەی روو دەدەن رای گەیاند، رۆڵی خراپی راگەیاندن، كاریگەریی لەسەر كاری پۆلیسیش كردووە، ئەوان دەڵێن: راگەیاندن بەر لە پۆلیس هەواڵەكە بڵاو دەكەنەوە و هۆكار و وردەكارییەكانیشی پێش لێكۆڵینەوە بڵاو دەكەنەوە، ئەوەش كاری دەزگا تەناهییەكانی ئەستەم كردووە.