ڕۆژنامە گرنگەكانی وەك ئیتیحاد، ئەلبەیان، ئەلخەلیج و وەتەن و چەندان سایت و پەیج و دەزگای راگەیاندنی تری عەرەبی، هەواڵیان لەسەر سەردانەكەی مەسروور بارزانی بۆ ئیمارات بڵاو كردووەتەوە.
هەموو رۆژنامە و راگەیاندنی ئیمارات، بەگرنگییەوە باسیان لە سەردانەكەی مەسروور بارزانی بۆ ئیمارات و دیداری لەگەڵ محەممەد بن زاید سەرۆكی ئیمارات و بەرپرسانی تری وڵاتەكە كردووە.
رۆژنامەكان لە یەكەم لاپەڕەی خۆیاندا بە گەورەیی هەواڵەكەیان داناوە و باسیان لەوە كردووە، "فەراهەمكردنی ئاسایش، سەقامگیری و ئاشتیی بەردەوامیان بۆ ناوچەكە گفتوگۆی مەسروور بارزانی و بەرپرسانی ئیمارات بووە.
ڕۆژنامەی "وەتەن" نووسیویەتی، سەردان و گفتوگۆكانی مەسروور بارزانی لە پێناو خێری گەلی هەردوولا بووە. خەلیج نووسیویەتی، دەستەبەركردنی گەشەپێدان و ئایندەیەكی گەش، گفتوگۆی مەسروور بارزانی بووە لەگەڵ سەرۆكی ئیمارات.
ئیمارات وەك وڵاتێكی گرنگی ناوچەكە كە خاوەن ئابوورییەكی بەهێزە و ئەوەش وای لێ كردووە، ببێتە یەكێك لە وڵاتە گەورەكانی عەرەبی و كاریگەریی لەسەر رووداوەكانی ناوچەكە و دنیاش هەیە، ئەم وڵاتە بۆ كورد و هەرێمی كوردستان گرنگیی تایبەتی هەیە.