بەپێی ئامارێك كە سوپای ئۆكراینا لەبارەی زیانەكانی سوپای رووسیا لەوەتەی لە ساڵی 2022وە دەستی پێ كردووە و ئەمڕۆ بڵاوی كردووەتەوە، ژمارەی كوژراو و بریندارانی سەربازانی رووسیا، گەیشتووەتە نزیكەی ملیۆنێك و 500 هەزار سەرباز، جیا لە تێكشكانی بەشێكی زۆری كەلوپەلە سەربازییەكانیان.
پێگەی "
ئەهرام"ی میسری ئەمڕۆ یەكشەم شەشی ئەیلوول، بەیاننامەی دەستەی ئەركانی گشتیی هێزە چەكدارەكانی ئۆكراینای لە ئامارێكدا بڵاو كردووەتەوە، باس لەوە دەكرێ كە لەوەتەی جەنگەكە دەستی پێ كردووە تا ئەمڕۆ، ملیۆنێك و 496 هەزار و 440 سەرباز كوژراون یان بریندار بوون، هاوكات لە 24 سەعاتی رابردووەوە هەزار و 390 سەربازی رووسی كوژراون یان بریندار بوون.
لەبارەی زیانەكانی سوپای رووسیا بەیاننامەكە ئاماژەی داوە، ژمارەی تێكشكانی تانكەكانی رووسی لەوەتەی جەنگەكە دەستی پێ كردووە، گەیشتووەتە 12 هەزار و 331 تانك، هەروەها تێكشكانی 25 هەزار و 278 زرێپۆش و 49 هەزار و 260 سیستمی تۆپهاوێژ، لەگەڵ دوو هەزار و 96 سیستمی راجیمە و هەزار و 605 سیستمی بەرگریی ئاسمانی.
زیاتر روونی كردووەتەوە كە لەوەتەی جەنگەكە دەستی پێ كردووە، 441 فڕۆكەی سەربازیی رووسی و 355 هەلیكۆپتەر تێكشكاون، لەگەڵ تێكشكانی 501 هەزار و 244 فڕۆكەی بێ فڕۆكەوان "درۆن"، لەگەڵ تەقاندنەوەی پێنج هەزار و 70 مووشەكی كرووز، لەگەڵ تێكشكانی 35 كەشتیی سەربازی و دوو ژێردەریایی، لەگەڵیاندا 144 هەزار و 435 ئۆتۆمبێل و تانكەری سووتەمەنیی سەربازی تێكشكاون.
جەنگی رووسیا لە دژی ئۆكراینا كە لە 24ی شوباتی 2022 دەستی پێ كرد، بەهۆیەوە هەزاران كوژراو و برینداری لە هەردوولا لێ كەوتووەتەوە، بەهۆیەوە ملیۆنان ئۆكراینیش ئاوارە بوون و شوێنەكانیان بەرەو وڵاتانی ئەوروپا جێهێشتووە. هاوكات ئەمەریكا و وڵاتانی رۆژئاوا سزای ئابووریی توندیان بەسەر رووسیادا سەپاندووە و لە هەمان كاتیشدا بە چەك و كەلوپەلی سەربازی و دارایی، پاڵپشتیی ئۆكراینا دەكەن.
بەڵام لەوەتەی دۆناڵد ترەمپ سەرۆكی ئەمەریكا وەك سەرۆكی ئەو وڵاتە دەستبەكار بوو، رۆڵی سەرەكی بینی وەك ناوەندگیر بۆ دەستپێكردنی دانوستانی نێوان رووسیا و ئۆكرانیا. ئێستەیش دانوستان بەردەوامە و ژمارەیەك دیلیان گۆڕیوەتەوە، بەڵام نەگەیشتووەتە ئاستی وەستانی جەنگەكە.