خیانەتكار ئەو كەسەیە كە پشت لە نیشتمانیی خۆی دەكات

هاوتەریب لەگەڵ دەركەوتنی ئۆپۆزسیۆنێكی پۆپۆلیستی و خرۆشاوی چەند ساڵێك لەمەوبەر لە هەرێمی كوردستاندا، جۆرە دید و كولتوورێكیش لەگەڵ ئەو ئۆپۆزسیۆنە كە خۆی بەرهەمی هێنا دروست دەبێت، ئەویش كولتووری بە (ڕەش بینینی) هەموو شتێكە. تا ئەو ئاستەی بوارێك بۆ جوانی و نرخاندنی كارێكی سیاسییانە و مرۆییانە و نەتەوەیی جوان نەماوەتەوە. ئاخر وەختێ لەشكرێك جوێندەر و زمانپیس، بە كۆیلە و ماستاوچی و پیاوی حزب ناوت دەبەن، تەنانەت ئەگەر كەسێكی ئەوپەڕی سەربەخۆ بێت، ئەوان ئازادییان تەنیا بۆ خۆیان دەوێت، ئەگەرچی بەناو ساڵانێكە لە دنیای پێشكەوتووی ئەوروپا دەژین، بەڵام هێشتا بە ڕەوای نابینن كەسێك بۆ خۆی پارتی بێت، بەڵام بۆ خۆیان ئاساییە لە ژێر ماسكی بەناو سەربەخۆییەوە، پەلاماری هەموو شتێك بدەن. 

ئەم كولتوورە جۆرە تێگەیشتنێكی لای هەندێك خەڵك دروست كردووە كە هەموو كەسێك وەك یەك ببینن و بخوێننەوە. دروست وەك ئەو پەندە كوردییەی دەڵێت: "لە دز وایە هەموو كەس دزە". ئەوانە لە پەراوێزی بەناو ئازادییەوە، بەداخەوە ئازادی بەرانبەرەكەیان پێشێل دەكەن و جۆرەها ناو و ناتۆرەی ناشیرین دەخەنە پاڵ بەرانبەرەكانیان، لە كاتێكدا ڕەنگە بەرانبەرەكە سەت ئەوەندەی ئەوان پاكتر و نیشتمانپەروەرتر بێت. 

بەناو نووسەرانێكی زۆر كە لە ئەوروپا دادەنیشن و بە پارەی سۆشیالی ئەو وڵاتانە دەژین، گوایە لە خەمی هاووڵاتییانی ئێمەدان لە باشوور، بۆیە لە ڕێی نووسینەكانیانەوە گەلێك جار شەكر دەشكێنن، بە ناوی ڕەخنەگرتن لە حكوومەت و دەسەڵات و حزب و زۆرجار كەسانی ئاسایی كە هیچ پێوەندییان بە سیاسەتەوە نییە نابوێرن. 

ئەمانە كە وەك شێری ماڵەوە و ڕێوی دەرەوەن، ناتوانن یەك كڕۆن یا یۆرۆ، باج بەو وڵاتانە نەدەن كە تا كارێكی ڕەشیان تێدا دەست دەكەوێت، دەبێ هەزار جار بپارێنەوە و بكڕووزێنەوە و خۆ لە پۆلیس بشارنەوە، كەچی دەمیان بستێك كراوەیە و زمانیان مەترێك درێژە، بۆ پەلاماردانی خەڵك و هەرێمەكەی خۆیان. 

لەو ڕۆژانەدا وتارێكی (دلێر محەمەد)* ناوێكم خوێندەوە، گوایە لە پەراوێزی خەمی نیشتمان و هاووڵاتییان لە باشوور نووسیویەتی، ئەو بە دەق ئەمەی نووسیوە: "ئێمە لەم پارچە بچووكەی باشووری كوردستان، ڕۆژانە خائین ئەژمێرین، ئێمە ڕۆژانە خائین بە جێمان دێڵێت و ڕۆژانە خائینی نوێ لە دایك دەبن". ئەگەر كەسێك ئەم چەند وشەیەی ئەو بنووسە بخوێنێتەوە، وا هەست دەكات كوردستان هەمووی ناپاكە و مرۆڤی پاك و بە ڕەوشت و نیشتمانپەروەر نەماوە. بەڵام ئایا ئەمە دروستە؟ بە كام پێوەر ئەم فەریكە نووسەرە هەموومان دەكاتە خیانەتكار و لە سۆنگەی ئەوەی ڕقی لە حزبێكە، دێت بە ئارەزووی خۆی چیرۆك دەهۆنێتەوە.

كەسانێك كە چركەیەك لەگەڵ خەمی نیشتمان و هاونیشتمانانیان نەژیاون، بێ مووچەیی و بێ كارەبایی و شەڕی تیرۆریستانی داعش و خوێنی ڕژاوی پێشمەرگەیەكی قارەمانی بە ناهەق شەهیدكراویان نەبینیوە، ترسی درۆنەكانی ئێران و فڕۆكەی توركیایان لەسەر نییە، نەك مافی ئەوەیان نییە باسی نیشتمان بكەن، بەڵكو دەبێ شەرم بیانگرێت و تەریق ببنەوە، هەر ناوی هەرێمی كورستانیش بێنن. بەڵام ئایا لەم سەردەمەدا شەرم ماوە؟ 

كەسێك لە خۆشی و ناخۆشی نیشتمانەكەی، گەلەكەی، هاوڕێ و ئازیزانی بەشدار نەبێت و لەوسەری دنیا های لایڤ بژیی، نەك مافی ئەوەی نییە باسی خیانەتكار بكات، بەڵكو دەبێ زۆرباش ئەو ڕاستییە بزانێت كە خیانەتكار ئەو كەسەیە پشت دەكاتە نیشتمان و نەتەوەكەی خۆی. 

ئەو جۆرە مرۆڤانە كەس نووسینیان بە فلسێكی قەڵب لێ ناكرێت، بۆیە هەموو ڕۆژێك دەقیڕێنن و باسی نادادی و كەموكورتییەكانی حكوومەت و خەمی هاووڵاتییان دەكەن، بەبێ ئەوەی خۆیان ئامادە بن لە نزیكەوە هاوبەشی ئەو خەم و ناسۆرییانە بكەن. ئەوە بۆیە هاووڵاتییانی ئێمە گوێ بەو جۆرە نووسینانە نادەن، چونكە دەزانن لە دڵسۆزییان نییە. ئەگەر ڕاست دەكەن، با بفەرموون بێنەوە كوردستان و سەركردایەتیی خۆپێشاندان و ناڕەزایەتییەك بكەن، بۆ ئەوەی ئێمەیش لە دوای ئەوانەوە بەشدار بین لە كوشتنی خیانەتكاران. 

ناونانی هەموو كەسێك بە خیانەتكار، وەك ئەوەی خۆت نیشتمانپەروەری پلە یەك و دڵسۆزی گەل و خاك بیت، تەنیا لە خەیاڵدانی ئەو بنووسەدا هەیە. هەموو كەسێك مافی ئەوەی هەبێت ڕەخنە بگرێت و لە خەمی نیشتماندا بێت، ئەو كەسانەی نیشتمانیان جێهێشتووە، ئەو مافەیان نییە، چونكە ئەگەر ڕاستگۆن، با بوێری و دلێریی ئەوەیان هەبێت بێنەوە كوردستان و لەناو ئەو هەموو خەم ناسۆری و كەموكورتییەدا، وەك من و ملیۆنانی وەك من ژیان بكەن، كە ئێمە خاكی خۆیشمان بە كەموكورتییەكانیشیەوە خۆشەوێ. 

ئەوانە ئەگەر لە خەمی منی هاووڵاتی باشووردان، دەیانەوێت ئازارەكانی ئێمە كەم بكەنەوە، با بوێرن ژیانی شاهانەی خۆیان لە ئەوروپا بەجێ بێڵن و بێن وەك ئێمە، لە بێ نەوتی و بێ كارەباییدا بژین و هاوبەشی خەم و ناسۆرییەكانمان بن، بۆ ئەوەی بە خۆشحاڵییەوە باوەڕیان پێ بكەین كە چەند لە خەمی ئێمەدان. 

ئەوانە، ئەگەر مەبەستیان دڵسۆزی و چاكسازییە و دەیانەوێت دەسەڵات و حكوومەت و میلەتەكەیان ڕیفۆرم بكەن، با بفەرموون لە ناوجەرگەی باشووردا خەبات بكەن و بە گژ كەموكورتییەكاندا بچنەوە، باكیان بە مردن لە پێناو داواكردنی مافی هاووڵاتییان نەبێت، وەك ئەوەی خۆیان بانگەشەی بۆ دەكەن، نەك لە دوورەوە قسەی زل و بێ مانا بكەن و بە ناوی داكۆكی و بەرگری لە هەمووان، هەمووان بە ناپاك بناسێنن. ئەم جۆرە كەسانە، چونكە ڕەخنە بە شكانەوە تێگەیشتوون و ئازادی بە بەڕەڵایی لەناو كۆمەڵگەكەی خۆیان لێك دەدەنەوە، ئیتر وا دەزانن هەر شتێكیان نووسی، دەچێتە خانەی ڕەخنەگرتن و چاكسازییەوە. 

بە كام پێوەر و هەڵسەنگاندن، ئەم بنووسە هەموومان دەكاتە خیانەتكار؟ ئاخۆ ئەو دەزانێت منێكی مامۆستا، لە ماوەی 26 ساڵی ژیانی فەرمانبەریدا، بە قەد گەردیلەیەك ناپاكیم لە هیچ شتێك نەكردووە؟ مانای چییە ڕۆژانە خیانەتكار لە باشوور لە دایك دەبن و خیانەتكاری نوێ دێن؟ ئەم جۆرە قسانە، تەنیا لای بەناو نووسەرانێك بوونی هەیە كە بەداخەوە بەشێك لە مینبەرەكانی بڵاوكردنەوە لە شێوەی تۆڕی كۆمەڵایەتی و ماڵپەڕەكان، دەرفەتی ئەوەیان بۆ ڕەخساندوون قسەی تێدا فڕێ بدەن، دواجاریش ئەمە بە ئازادیی نووسین و دڵسۆزی ڕەخنەگرتن و نیازپاكی لەپێناو نیشتمانەكەیان لێك بدەنەوە، لە كاتێكدا پێچەوانەكەی ڕاستە. 

ئاخۆ ئەم بنووسە لەو وڵاتەی تێیدا دەژیی، كە لە لووتكەی دیموكراسیی و ئازادی و مافەكانی تاكدایە، دەتوانێت هەموو نەرویجییەكان بە خیانەتكار بناسێنێت؟ یان ئەو تەنیا شێری ماڵەوە و ڕێوی دەرەوەیە؟.

دواجار بە پێویستی دەزانم پەرلەمان و حكوومەت، بە یاسا نووسین و مینبەرەكانی بڵاوكردنەوە ڕێك بخەن و سنوورێك بۆ ئەوانە دابنێن كە ئازادی بە بەڕەڵایی تێگەیشتوون، لە كاتێكدا گوایە خۆیان لە ئەوروپای ئازاد و پێشكەوتوو دەژین، كەچی لەوێش هەموو شتێك بە مانای ئازادیی گوتن و كردن ڕێپێدراو نییە.

*سەرنج: وتارەكەی ئەم بنووسە، لە ماڵپەڕی سپی میدیا بڵاو بووەتەوە، بەڵام ئێمە چونكە بابەتەكانمان تەنیا لە "وشە" بڵاو دەكەینەوە و بابەت بۆ هیچ ماڵپەڕێكی تر نانێرین، بۆیە ئەم وەڵامەیشمان هەر لەو ماڵپەڕە سەنگینە بڵاو كردەوە.