كاتێک گوێمان لەم ڕستەیە بوو: "سەدام حسێن، هەزار جار قەبری پڕ نوور بێت یا ڕەبی... سەری بە قەبری ئەوەشی كە پێی ناخۆشە." یەكسەر ڕووفاتی ئەنفالەكانی گەرمیان و بارزان، كیمیایی هەڵەبجە و عومەری خاوەر، ئەبووغرێب و زۆر شتی ترمان بیر هاتەوە و هەستێكی تووڕەییی هیستیری بەسەر هەمووماندا باری. لێرەدا هەموومان، مەبەستم لەوانەیە كە هێشتا جینۆساید و كارەساتەكانی دەستی ڕژێمەكەی ئەو كابرایەمان بیر ماوە، وا عومەر فەقێ قەبری پڕ نوور دەكات، ئەگینا زۆری دیكەیش هەن وەك ئەون. ئەوانە كێن؟
یەكەم: گەرمترین بازاڕ لە كوردستاندا، بازاڕی خانوبەرەیە، ئەوانەی نووسینگەی كڕین و فرۆشتنی خانوویان هەیە، یان كۆمپانیا و بەڵێندەری بوارەكەن، بەركەوتەی مامەڵەن لەگەڵ عەرەب. دەتوانم بڵێم بازاڕەكە بۆیە گەرمە، چونكە عەرەب كڕین و فرۆشتنی زۆری پێوە دەكەن. ئەو عەرەبانە زۆرینەیان سوننەن و بەشێكیان كۆنە بەعسین و بەشێكیشیان لە داخی دەسەڵاتی زۆرداری و ناشرینی شیعەی عێراق، خۆزگە بە سەردەمی ڕژێمی بەعس دەخوازن. ئەو ڕژێمە بە هەموو خراپییەكەشییەوە، بە هەموو زۆرداری و مەینەتییەكەی بەسەر هەموو عێراقیدا هێنا، هێشتا لای سوننە زۆر لە ئێستەیان باشترە، بۆیە لە دوعاكانیاندا قەبری سەدام پڕ نوور دەكەن. مرۆڤی بازرگان شوێنكەوتەی بڕوای كڕیارانێتی، ئەمەیش گوتەی من نییە، گوتەی ماركسە. بڕۆن سەیری زۆربەی ئەو بازرگانانە بكەن كە مامەڵەیان لەگەڵ عەرەبدا هەیە، بزانە بۆچوونیان لەبارەی سەدامەوە، نزیكە لەم عومەرە یان نا!
دووەم: ئەو حزبانەی دژی دەسەڵاتی پارتی و یەكێتی بانگەشە دەكەن، بە مەبەست یان بێ مەبەست، بۆ ئەوەی بیسەلمێنن هەموو دەسەڵاتێک لەم دنیایەدا لە حكوومەتی هەرێمی كوردستان باشترە، ئامادەن تەنانەت بە ڕژێمی بەعسیشی بچوێنن و ئەوان لەمان بە باشتر پێشان بدەن، ئەمەیش هەڵبەت بەهۆی ئەوەی حكوومەت كەمتەرخەم بووە لە جێبەجێكردنی ئەو یاسایانەی پەرلەمان دەرهەق بە بانگەشە بۆ ڕژێمی بەعس و سەرۆكەكەی دەریكردون، ئەگینا دەبوو هەموو ئەو بانگەشەكارانە بەلای كەمەوە، پێنج ساڵ بگیرێن.
سێیەم: بەشێكی ئیسلامییەكانی كوردستان، بەردەوام بۆ شكاندنی هێما و سیمبولە نەتەوەیییەكانی كورد، نموونەی باڵای تر دەهێننەوە كە لە چوار جێنشینەكەی پەیامهێنەوە دەست پێ دەكات و دواینیشیان وەک سەركردەیەكی گەورە ناوی سەدام ڕیز دەكەن. هۆكارەكەی بۆ تەوژمە ئیخوانیزمییە جیهانییەكە دەگەڕێتەوە كە جەزیرە بانگەشەی بۆ دەكات و ئەو كەناڵە وایكردووە دۆزی فەلەستین تەواو بەرجەستە بێت. ئیسلامیی كوردیش كاتێک دەبینن فەلەستینییەكان سەدام بە سەركردەیەكی مەزن دەبینن، ئەمانیش بەبێ گوێدانە مێژووی خوێناویی ئەو نەفرەتییە بەرانبەر كورد، بە چاویلكەی ئەوان لێی دەڕوانن و هەوڵ دەدەن ئەو چاویلكەیە بكەنە منداڵی كوردیشەوە.
چوارەم: بە گشتی كورد یادگەی لاوازە، ئەمەیش جیاوازییەكی ڕیشەییی ئێمە و جووە. گەلی جوو پێش پێنج هەزار ساڵ یەكێ پەسنی نەدابن، ئێستەیش لە بیریانە و منداڵەكانیان فێر دەكەن بەو ڕقەوە بژین. ئێمەی كورد نەک ستەمی سەداممان لەبیر كردووە، ئەوەتا گۆرانی بۆ ئەوە هەڵدەدەین حكوومەتی هەرێمی كوردستان هیچ دەسەڵاتێكی نەمێنێت و هەمووی بكەوێتە دەستی عێراقی شیعە، چونكە بیرمان نییە لە 16ی ئۆكتۆبەردا ئەو میلیشیایانە چ ئەتكێتی كەركووک و خورماتوویان كرد، چونكە هۆشمان ئەوەندە نییە هەست بەو هەموو پیلانە بكەین كە بەردەوام لەسەر ناسنامەمان دەیكەن و نازانین گەمەی مووچە، بەشێكە لەو پیلانگێڕییانە.
كا عومەر، هەموو خاڵەكانی تێدا جێبەجێ دەبێت، خۆی سمسارە و خەریكی خانووفرۆشتنە بە عەرەب، سەر بە قەوارەیەكی پۆپۆلیستییە بۆ ناشرینكردنی دەسەڵاتی كورد، ئیسلامییەكی ژێر هەژموونی ئیخوانییە و كوردێكی بێ نەزاكەتە.