ده‌ما سێ رۆژایه ب رێیا ئاراسته‌كرنا موشه‌كان، شه‌ر دناڤبه‌را ئیران و ئیسرائیلێ به‌رده‌وامه، هه‌ر چه‌ند دچیت ره‌وش خراپتر دبیت، شاره‌زایه‌كێ سیاسه‌تا ده‌رڤه‌یا ئه‌مریكا بۆ رۆژهه‌لاتا ناڤه‌راست و پرسا كوردان ژی دده‌ت دیاركرن كو ئیران هه‌موو بزاڤن دكه‌ت شه‌ر بهێته راوستاندن.
نەوزاد هێتوتی، شاره‌زایێ سیاسه‌تا ده‌رڤه‌یا ئه‌مریكا بۆ رۆژهه‌لاتا ناڤه‌راست و پرسا كوردان بۆ "وشە" گوت، د نوكه دا ئێران ترسه‌كا مه‌زن ل وێ یه‌كێ هەیە ئه‌گه‌ر هێرشێن ئیسرائیلێ بەردەوام بن دێ سەر كێشیته هه‌رفاندنا سیستمێ سیاسی ل تەهرانێ، له‌وا هەموو بزاڤان دكه‌ت كو شه‌ری راگریت، هه‌تا خۆ په‌یوه‌ندی ب چه‌ند ده‌وله‌تان كریه، ژ وانان قه‌ته‌ر، ئیمارات، روسیا و قوبرس بۆ هندێ ناڤه‌نده‌گیریێ دناڤبه‌را وان دا بكه‌ن.
زێده‌تر گۆت، هه‌ر چه‌نده دویر نیه ئیران یا به‌رهه‌ڤ بیت كو ب تمامی ده‌ستبه‌ردارێ به‌رنامێ ئه‌تومی بیت، تنێ بۆ هندێ یه شه‌ر بهێته راگرتن، به‌لێ یا روهنه كو ئیران هه‌ست ب هندێ دكه‌ت هه‌ره‌شه‌یێن مه‌زن ل سه‌ر سیستمێ سیاسی یا وه‌لاتێ وان هه‌یه، به‌لێ ناهێته چاڤه‌ریكرن كو ئیسرائیل هوسا ب ساناهی ده‌ست ژ شه‌رێ ئیرانێ به‌رده‌ت، ژبه‌ركو ده‌رفه‌ته‌كا زێرین بۆ ئیسرائیلێ هاتیه پێش و حه‌زناكه‌ت ژ ده‌ست بده‌ت.
ناڤبری دیاركر ژی كو هه‌تا نوكه ئیسرائیلێ شیایه گورزێن كوژه‌ك ل ئیرانێ بدده‌ت ب تایبه‌تی فوكسا ئیسرائیلێ ل سه‌ر كوشتنا سه‌ركرده و زانایێن ئه‌تومی و بنگه‌هێن وان و به‌رنامه و موشه‌كێن بالستی و كارگه‌هێن خوكوژی یێن درونایه و گۆتژی، دبیت ل ئه‌ڤرۆ وێڤه ئیسرائیل ژێرخانا ئابووری ب تایبه‌تی به‌نده‌ران و ژێده‌رێن وزه‌یێ و سوته‌مه‌نی بكه‌ته ئارمانج، یا ژ هه‌مووان گرنگتر نوكه 90%ێ ئه‌سمانێ ئیرانێ ب ده‌ست ئیسرائیله و تشته‌ك نه‌مایه بناڤێ سیستمێ به‌ره‌ڤانیێ یا ئیرانی، ئه‌ڤ یه‌ك ژی بویه ئه‌گه‌ر كو ئیسرائیل یا ده‌ست ڤه‌كری بیت و چه‌وا بڤێت وه‌سا ئارمانجێن خۆ بینیت.
ئیران ژبلی ئارمانجێن سنوردار، نه‌شیایه كورزێن كوشنده ل ئیسرائیلێ بده‌ت، هه‌تا خۆ ئه‌و هێرشێن ئیرانێ كری ژی 90%ێ شكه‌ستن ئینایه و هاتینه ژناڤبرن و تنێ چه‌ند موشه‌كێن كێم ئه‌سمانێ ئیسرائیل بریه و ب هه‌ره‌مه‌كی ب ناڤ ئیسرائیلێ و جهێن سڤێلا كه‌فتنه، ئارمانجا ئیسرائیلێ ل ڤان هێرشان تێكدان و ژناڤبرنا تمامی یا به‌رنامێ ئه‌تومی و لاوازكرن و كێمكرنا شیانێن موشه‌كێن ئیرانێ یه، دیسان لاوازكرنا پێگه‌هێ سیاسی و سه‌ربازی ل ئاستێ ده‌ڤه‌رێ یه، دیسان لاوازكرنا هێزێن پروكسیان و هشككرنا ژێده‌رێن دارایی یێن ئیرانێ یه، له‌وا دبیت ده‌مێن داهاتی زێده‌تر ژێده‌رێن وزه و به‌نده‌ر ببنه ئارمانجا ئیسرائیلێ، دیسان هاندانا خه‌لكێ ئیرانێ یه ب رێیا خونیشاندانان بۆ هه‌رفاندنا ده‌ستهه‌لاتا ئیرانێ، هێتوتی هوسا گۆت.
ب باوه‌ریا هێتوتی، ئه‌گه‌ر ئیران له‌ز نه‌كه‌ت ل رێكه‌فتنا ئه‌تومی یان ژی خو راده‌ست نه‌كه‌ت و ب داخوازیێن ئه‌مریكا و ئیسرائیلێ رازی نه‌بیت، رۆژێن داهاتی دێ دژوارتربن و گۆتژی، ئیرانێ دوو رێی هه‌نه، یان زڤریت بۆ دانوستاندنان و رازیبون ب داخوازیێن ئه‌مریكا، یان ژی شه‌ر دێ به‌رده‌وام بیت و مه‌ترسیێن خراپ ل سه‌ر ئیرانێ دروست بن، نوكه ئیران په‌نا بۆ چه‌ند كاره‌كا بریه ژ وانان به‌رفره‌هكرنا بازنا شه‌ری ل ده‌ڤه‌رێ و پالدانا هێزێن پروكسی و هێرشكرنا سه‌ر بنگه‌هێن ئه‌مریكا و هه‌ڤپه‌یمانان ل ده‌ڤه‌رێ، دیسان گرتنا گه‌رویا هورمز و پالدانا حوسیان داكو ده‌ریا سوور بگرن و رێگریێ ل چونا په‌ترۆلێ بكه‌ن بۆ بازارێن جیهانێ داكو قه‌یرانێن مه‌زن ل جیهانێ دروست بكه‌ن، بڤی ره‌نگی ئیران ئاریشا خۆ بكه‌ت یا جیهانی و وه‌كو كارته‌كێ بكاربینیت ب ژدی ئه‌مریكا و ئیسرائیلێ.