دوای لێدانی كتوپڕی دۆحەی پایەتەختی قەتەڕ وڵاتانی ناوچەكە گەیشتنە ئەو قەناعەتەی هیچ شتێك نییە ئاگری شەڕیان لێ دوور بخاتەوە، بەتایبەتی ئەو وڵاتانەی میلیشیایان هەیە وەك عێراق، قەتەر كە هاوپەیمانێكی بەهێزی واشنتنە و وەبەرهێنانی گەورەی لە ئەمەریكا هەیە، لە هێرشی ئیسرائیل پارێزراو نەبوو، دەبێ دۆخی عێراق چۆن بێت؟، مامۆستایەكی زانۆ پێی وایە دەبێت عێراق چەند هەنگاوێكی بەپەلە بنێت.
عەلی جبووری مامۆستای زانستە سیاسییەكان دەڵێت، لە دوای هێرشەكەی سەر قەتەڕ و پەرەسەندنەكانی دوایی لە ناوچەكە، نیگەرانی لە عێراق لەبارەی ئەگەری هێرشێكی ئیسرائیلی بۆ سەری زیاتر بووە، بەتایبەتی لە سایەی پەرەسەندنی ئاڵۆزییەكانی نێوان ئێران و ئیسرائیل و گەیشتنی ململانێكان بۆ چەندان گۆڕەپانی ناوچەكە.
روونی كردەوە، عێراق لە پێگەیەكی هەستیار وەستاوە، بەو پێیەی دەبێتە قوولاییەكی ستراتیجی بۆ هەر شەڕێكی گریمانكراو لە ناوچەكە، ئەوەش مەترسی زیاد دەكات بەوەی ببێتە گۆڕەپانێك بۆ یەكلاكردنەوەی حیساباتی دەرەكی، بۆیە زیادبوونی قسەوباسی سیاسی و میدیایی لەبارەی هێرشێكی چاوەڕوانكراو، حكوومەت دەخەنە بەردەم كێشەی گەورە پێوەست بە سیستمی بەرگریی و پێویستیی زیادكردنی هاوئاهەنگیی تەناهی لەگەڵ هاوپەیمانان.
ئەو مامۆستایە پێی وایە بۆ قۆناغی داهاتوو پێویستە عێراق جموجۆڵێكی بەپەلەی دیپلۆماسی دەست پێ بكات بۆ دڵنیاكردنەوەی بەرەی ناوخۆیی و سووككردنی مەترسییە جەماوەرییەكان، بە هاوتا لەگەڵ كاراكردنی كەناڵەكانی پێوەندیی ناوچەیی و نێودەوڵەتی بۆ دوورخستنەوەی وڵات لە مەترسیی رووچوون بۆ ناو ململانێیەكی راستەوخۆ یان ناراستەوخۆ لە ناوچەكەدا.