سێ رۆژە پەرلەمانی عێراق دەیەوێ دانیشتنێكی ئاسایی ساز بكات و بەهۆی ناتەواویی نیسابی یاسایی ساز ناكرێت، یەكێك لە بڕگەكانی كارنامەی دانیشتنەكان دەنگدان بوو لەسەر پڕۆژەیاسای پەسندكردنی رێككەوتننامەی هاندان و پاراستنی وەبەرهێنانی دوولایەنە لە نێوان عێراق و سعوودیە، كە شیعە پێی رازی نین و وەبەرهێنانێكی گەورەی سعوودیە لە عێراق لەخۆ دەگرێت.
ئێستە
هێزە شیعەكان، بەتایبەتی میلیشیاكان رێگری لە وەبەرهێنانی سعوودیە بە بڕی تا 100 ملیار دۆلار لە عێراق دەكەن، ناكۆكییەكان لەسەر ئەو بابەتە گەیشتە پەرلەمان و هێزە شیعەكانی نزیك لە میلیشیاكان داوای كشاندنەوەی پڕۆژەكە دەكەن، ئەوەش بووە هۆی پەكخستنی چەند دانیشتنێكی پەرلەمان.
ئەو پڕۆژەی سعوودیە- عێراق كە بەر لە حەوت ساڵ رێككەوتنی لەسەر كراوە، رێگە بە ریاز دەدات بۆ بەكارهێنانی ناوچە بیابانییەكان لەناو خاكی عێراق و وەبەرهێنانەكە كەرتەكانی وزە و ژێرخانیش دەگرێتەوە، بەپێی سەرچاوە سیاسییەكان تا ئێستە ئێران ڤیتۆ لەبەردەم دەسترۆیشتوویی ئابووری و سیاسیی سعوودیە لە عێراق دادەنێت، سەرەڕای لێكنزیكبوونەوەیان.
بەپێی سەرچاوە عێراقییەكان میلیشیا شیعەكان كۆنترۆڵی ناوچە سنوورییەكان لەگەڵ سعوودیە دەكەن و كێبەركێ لەسەر وەبەرهێنان لە ناوچەكە دەكەن، ئەوەش لەبەر دوو هۆكار، دەستكەوتنی پارە و جێبەجێكردنی ئامانجی ئێران لە رێگرتن لە سعوودیە بۆ هاتنە ناو عێراق.
سەرەڕای ئاساییبوونەوەی پێوەندییەكانی سعوودیە و ئێران، بەڵام سەرچاوە سیاسییەكان لە راوێژكاری هێزێكی سیاسیی شیعە دەگوازنەوە كە تا ئێستە ئێران رازی نییە و هەشە پاساو بۆ ئەو كارە دێنێتەوە بەوەی هانی دروستبوونی هەرێمێكی سوننە لە ناوچەكە دەدات.