ئێستە عێراق لە قۆناغی بانگەشە و پێش هەڵبژاردنە، جیا لەوەی لیست و كاندیدان كێبەركێی گەیشتن بە پەرلەمان و وەرگرتنی پۆست دەكەن، هێزە گەورەكان و سەركردەكانیان كێبەركێی وەرگرتنی پۆستە باڵاكان و دەسەڵات دەكەن، بەتایبەتی سەرۆكی حكوومەت، شارەزایان پێیان وایە ئەمەریكا كەسێكی لە لووتكەی دەسەڵات دەوێ كە مەرجەكانی جێبەجێ بكات و هاوپەیمانیی ئەمەریكا بێت.
ئەحمەد یاسری توێژەری سیاسی وای دەبینێت كە مەرج نییە ئەوەی ترەمپ لە قسەكانی باسی بكات ببێتە سیاسەتی دەرەوەی ئیدارەكەی، لە شەرمولشێخ كە باسی عێراق و نەوتەكەی كرد، شتێكی ئاسایی بوو و باسی زۆر شتی لەسەر وڵاتان كرد، لەبارەی بەشداریكردنی سوودانی لە لووتكەكەی میسر لەگەڵ ترەمپ گوتی، رەنگە ئەو سوودی كردبێت و چەند ئاماژەیەك هەبن بەوەی رەنگە سوودانی كەسێكی كۆك و تێگەیشتوو بێت لەگەڵ ئیدارەی ئەمەریكا.
ئەو توێژەرە كە سەرۆكی ناوەندی عەرەبی ئوسترالییە بۆ توێژینەوەی ستراتیجی روونی كردەوە، بنەمای سەرەكیی بۆ سیاسەتی ئیدارەی ترەمپ بۆ مامەڵەكردن لەگەڵ عێراق پێوەستە بە دۆسیەی ئێران، ئەگەر ترەمپ لە دۆخێكی ئاڵۆز بێت لەگەڵ تاران، هەوڵ دەدات عێراقی لێ دوور بخاتەوە و ئەگەر لە حاڵەتێكی نزیك یەكتر بن، بوارێكی پێ دەدات، بە گشتی واشنتن گرنگی بە هەڵبژاردنی عێراق نادات، بەڵكو گرنگی بەوە دەدات كە چ كەسایەتییەكی سیاسی دێنێتە پێشەوە.
یاسری ئاماژەی كرد، گرنگ بۆ ئەمەریكا ئەوەیە ئەو هەڵبژاردنە كەسێكی تێگەیشتوو لەگەڵ ئەمەریكا بێنێتە پێش، جا شیعە یان سوننە یان كورد بێت، مەرجەكە ئەوەیە سەر بە سوپای پاسدارانی ئێران یان ملكەچی ئەو وڵاتە نەبێت، گرنگ نییە كەسێكی خاوەن پێوەندی بێت لەگەڵ تاران، چونكە وڵاتانی كەنداو كە هاوپەیمانی ئەمەریكان، پێوەندییان لەگەڵ ئێران هەیە.
لای خۆیەوە میسال ئالووسی سیاسەتوانی دێرینی عێراق پێی وایە ئەمەریكا بە دوای حكوومەتێكە لە عێراق كە نوێنەرایەتیی بەغدا بكات نەك تاران، ئەمەریكا بە نیازە وەبەرهێنانی كۆمپانیاكانی لە عێراق زیاتر بكات و ئەوەش پەیامێكە بەوەی عێراق بەرەو سەقامگیری هان دەدات، بەڵام هاوكات قبووڵی باڵادەستیی میلیشیاكان ناكات.