هەڵبژاردنی ئەوجارەی عێراق جیاوازە، لەو كاتەی زۆرینەی هێزە سیاسییەكان، بەتایبەتی لە ناو ماڵی شیعە ترسیان لە ئەنجامەكان هەیە، ئەوەش بەهۆی لاوازیی بەشداریكردنی دەنگدەران و كاریگەریی ئەو گۆڕانكارییەی لە ناوچەكە و لاوازبوونی هەژموونی ئێران بەسەر عێراق دروست بووە، سیاسەتوانێك پێی وایە پێكهێنانی حكوومەتی عێراق و سازانی هێزە سیاسییەكان ئاسان نییە.
تەڵاڵ جبووری سیاسەتوان دەڵێت، لە دوای راگەیاندنی ئەنجامی هەڵبژاردنی پەرلەمانی عێراق، ناكۆكییەكان زیاتر پەرە دەستێنن و وا دەكەن قۆناغی دوای هەڵبژاردن لە قۆناغی ئێستە مەترسیدارتر بێت.
روونی كردەوە، گوتاری ئێستەی پێش هەڵبژاردن ئەگەرچی گەرمە، بەڵام لە چوارچێوەی بانگەشە و كێبەركێی سیاسیدایە، بەڵام بۆ دوای هەڵبژاردن و راگەیاندنی ئەنجامەكان، ململانێكە لە شەقامەوە دەچێتە ناو ناوەندی بڕیار و ململانێ لەبارەی پێكهێنانی حكوومەت و دابەشكردنی پۆست و دەستكەوت دەست پێ دەكات، بەتایبەتی یەكنەگرتنەوەی بەرژەوەندییەكان و نەبوونی سازانی راستەقینەی نیشتمانی بەرەو تەنگژەیەكی سیاسی قووڵتر لە پێشوومان دەبات.
ئەو سیاسەتوانە كە هاوكات شارەزایەكی ستراتیجییە ئاماژەی كرد كە لایەنە دۆڕاوەكان خۆیان بە ستەملێكراو دەزانن و رەنگە پەنا بۆ پەرەسەندنی سیاسی و گوشاری سەقام بۆ تێككەڵكردنی كارتەكان ببەن، ئەوەش هەڕەشە لە سەقامگیریی دۆخەكە دەكات و ئەگەری داخرانی سیاسی زیاد دەكات، دابەشبوونی ناو پێكهاتەكان خۆیان دۆخەكە زیاتر ئاڵۆز دەكەن.
جبووری پێی وایە ئەو دۆخە پێویستی بە لێكتێگەیشتنی زووی هێزە سیاسییە سەرەكییەكان هەیە بۆ رێزگرتنی ئەنجامی پرۆسەكە و پابەندبوون بە نەخشەرێگەیەك بۆ پێكهێنانی حكوومەتێكی بەهێز لە دوای هەڵبژاردن.