مستەفا قەرەسوو: چیتر كاتی قسە نییە و چاوەڕێی كرداری دەوڵەتی توركیاین

مستەفا قەرەسوو ڕای گەیاند، چیتر كاتی قسە نییە، كاتی كردارە و گوتیشی: ئێمە لە هەموو دەرفەتێكدا داوا دەكەین ئۆجەلان بتوانێ ئازادانە بژی و كار بكات.

مستەفا قەرەسوو ئەندامی كۆنسەی بەڕێوەبەریی كەجەكە، لە میانی بەشداریكردنی لە بەرنامەی تایبەتی مەدیا خەبەر تیڤـدا، لەبارەی پرۆسەی ئاشتی و كۆمەڵگەی دیموكراتیك و كشانەوەی هێزەكانی گەریلای لە باكوری كوردستان، قسەی كرد.

لە سەرەتای قسەكانیدا ئاماژەی بەوە كرد، گرووپێك لە هێزەكانی گەریلامان لە باكور كشانەوە، ئەم هەنگاوە دەرخەری ئیرادەی ئێمەیە بۆ سەرخستنی پرۆسەی ئاشتی و كۆمەڵگەی دیموكراتیك، ئێمە كۆتاییمان بە كار و چالاكی لە ژێر ناوی پەكەكە و تێكۆشانی چەكداری هێنا، دیسانەوە ئیرادەی خۆمان پێشان دا، هێزی گەریلامان لە هەموو باكوری كوردستان هەبوون، بەڵام لە هەندێك هەرێم مەترسیی پێكدادان هەبوو، بۆیە بە باشمان زانی هێزەكانمان لەو هەرێمانە بكشێنینەوە كە مەترسیی شەڕ و پێكدادان هەیە، چونكە لە پرۆسەیەكی وەهادا، هەندێك نەیاری پرۆسەكە و ئاشتی هەن، هەموو پروپاگەندەیەكی ڕەشكردن دژی ئێمە بەكار دێنن و لەڕێگەی هەوڵی تێكدەرانە و ئاژاوەگێڕانەوە دەتوانن ئەم پرۆسەیە ژەهراوی بكەن.

گوتیشی: بۆ سەركەوتنی ئەم پرۆسەیە، بۆ تێپەڕاندنی گفتوگۆكان لەبارەی بەبنەستگەیشتنی پرۆسەكە و پێشاندانی ئیرادەی چارەسەر، بە پێویستمان زانی هەنگاوێكی وەها بنێین، ئەمە هەنگاوێكی یەكلایەنە بوو، چەندان هەنگاوی یەكلایەنەمان ناوە، هەوڵ دەدەین لەم ڕێگەیەوە هانی دەوڵەت و دەسەڵاتی ئاكەپە و مەهەپە بدەین، تا هەنگاو بنێن و زەوینە بڕەخسێنن، ئۆجەلان لە سەرەتاوە هەڵوێستی ماقووڵی پێشان داوە و تا ئێستەش بەردەوامە، ساڵێك بەسەر پرۆسەكەدا تێپەڕی، ئەگەر تا ئێستە باسی پرۆسەكە دەكەین، ئەمە لە سایەی ڕێبەر ئاپۆیە كە بەرپرسیارانە مامەڵە دەكات و ئێمەش وەك تەڤگەرەكەمان لە چوارچێوەی دیدگەكانی ئەو دەجووڵێینەوە.

باسی لەوەش كرد، دوای ئەوەی بڕیارمان دا، هەم دەوڵەت باخچەلی و هەم حكوومەت، پێزانینیان هەبوو كە بڕیارەكانمان باشن، ئەگەر ئەوان بڕیارەكانمان بەباش دەزانن، ئەوا ناوەڕۆكی بڕیارەكانمان و گرنگترین گوزارشتی ئەم بڕیارانە ئەوەیە كە لەلایەن ڕێبەر ئاپۆوە جێبەجێ بكرێن، ئەوە دروست نییە كە هەندێك لە بڕیارەكانمان ببینرێن و هەندێكی تریان نەبینرێن، لەم ڕووەوە دەبێت بەگشتی مامەڵە لەگەڵ بڕیارەكانمان بكەن، لە مانگی ئایارەوە ئەو هەلومەرجەی كە ئێمە دەمانویست ڕێبەر ئاپۆ دەستوەردان بكات و پرۆسەكە بەڕێوە ببات، هێشتا نەڕەخسێنراوە، بۆیە ئێمە لە هەموو دەرفەتێكدا داوا دەكەین كە ڕێبەر ئاپۆ بتوانێ ئازادانە بژی و كار بكات، پرۆسەكە بەم جۆرە بەردەوام دەبێت.

ئەو ئەندامەی كۆنسەی بەڕێوەبەریی كەجەكە گوتیشی: پەكەكە 52 ساڵە تێدەكۆشێت، هەزاران گەریلای هەیە، كادری هەیە و سەتان هەزار لایەنگری هەیە، واتە ئەگەر پرسە لەم ڕووەوە چارەسەر بكرێت، بۆیە دەبێت یاساكانی پێوەست بە چارەسەری ڕاستەقینە دەربكرێن، ئێستە ئێمە باسی سیاسەتی دیموكراتیك دەكەین، ئاپۆش گوتی كە دەتوانم ئیرادەی خۆم پێشان بدەم بۆ تێپەڕاندنی تێكۆشانی چەكداری بەرەو زەوینەی سیاسی و یاسایی، لەم ڕووەوە هەنگاوی گەورەمان هاویشت و دەبێت زەوینەیەك بۆ سیاسەتی دیموكراتیك بڕەخسێنرێت.

ئاماژەی بەوە كرد، كێشەیەك لە نێوان كورد و دەوڵەتی توركدا هەیە، كێشەیەك كە 100 ساڵە بەردەوامە، وەك دەوڵەتی خۆیان نایبینن، لەبەرئەوەی نكۆڵی لە ناسنامەی دەكات، نكۆڵی لە زمانی دەكات و نكۆڵی لە هەموو شتێكی دەكات، لەم ڕووەوە ئەو یاسایانەی كە ڕێبەرێتی پێیان دەڵێت، "ئەنتێگراسیۆنی دیموكراتیك"، بەو مەبەستەن كە ئەم دابڕانە نەهێڵن، كورد خۆیان وەك بەشێك لە دەوڵەتی تورك ببینن، ببینن كە بە ناسنامە و كولتووری خۆیانەوە دەژین، ئێمە باوەڕمان وایە كە ئەمانە بە یاساكانی ئەنتێگراسیۆنی دیموكراتیك دێنەدی.

لە قسەكانیدا قەرەسوو گوتیشی: ئێستە كاتی قسە نییە، كاتی كردارە، لە سەرەتای پرۆسەكەدا قسەی جوان و ئەرێنی و گرنگ پێویست بوو، بەڵام ئێستە، پێویستە شتێكی واوەتر لە قسە بكرێت، بەڵام بەهۆی مامەڵەی دەسەڵاتەوە ساڵێكە هەنگاوی رژدی نەناوە، دەسەڵات هەموو جارێك چاوەڕێی هەنگاوی یەكلایەنەیە، ئەمە نیگەرانی و دوودڵی دروست دەكات، لەم ڕووەوە قسە نا، كردار پێویستە.