میدیاکانی ئیسرائیل ئاشکرایان کرد، هێزی دەریاییی ئەو وڵاتە تەقەی لە کەشتییەکی جەنگیی میسری کردووە دوای ئەوەی سنووری ئاویی کەرتی غەزەی بەزاندووە و ناچاریان کردووە بگەڕێتەوە.
ئەمشەو پێنجشەم هەشتی کانوونی دووەمی 2026، کەناڵی "13"ی ئیسرائیلی بڵاوی کردەوە، کەشتییەکی جەنگیی میسر لە نیمچە دوورگەی سیناوە دەرچووە و چووەتە ناو ئاوە هەرێمییەکانی غەزە، کە ناوچەیەکی قەدەغەکراوە بۆ کەشتیوانی.
بەپێی زانیارییەکان، دوای دەستنیشانکردنی کەشتییەکە، کەشتییە جەنگییەکانی ئیسرائیل لە بنکەی دەریاییی "ئەشدۆد"ەوە جووڵێنراون و داوایان لێ کردووە بگەڕێتەوە، بەڵام بەردەوام بووە لە پێشڕەوی، بۆیە هێزەکانی ئیسرائیل تەقەی ئاگادارکردنەوەیان لێ کردووە و دواجار کەشتییە میسرییەکە ئاراستەکەی گۆڕیوە و گەڕاوەتەوە.
گوتەبێژی سوپای ئیسرائیل ڕووداوەکەی پشتڕاست کردووەتەوە و ڕای گەیاندووە، هێزەکانیان بەپێی ڕێکارەکان مامەڵەیان کردووە.
سەرچاوەکانی سوپای ئیسرائیل بە کەناڵەکەیان ڕاگەیاندووە، لایەنی میسری بەرپرسیارێتیی ئەم ڕووداوەیان لە ئەستۆ گرتووە.