كورد تەنیا ئەگەر كوردستانی گەورە لە نەخشەی رۆژهەڵاتی ناوەڕاست ببینێ متمانەی دەبێت
زلهێزەكان پشتیوانی سەربازی كورد دەكەن بەڵام لە پرۆژەی سیاسی لەگەڵیان نابن
كورد هەمیشە وەك ئامرازێكی تەكتیكی لە ململانێیە گەورەكان بەكارهاتووە
ئەزموونی سووریا بۆ كورد وانەیەكی سەخت بوو
رۆژنامەی عەرەبی جەدید ئەمڕۆ وتارێكی بڵاوكردووەتەوە و تێیدا پرسیاری ئەوە دەكات: بۆ دەبێت كورد متمانە بە واشنتن بكەن؟ لە وتارەكەدا باس لەوە كراوە ئەمەریكا و زلهێزەكان هەمیشە لە پرۆژەی سیاسی پشتیان لە كورد كردووە و تەنیا وەك هێزێكی تەكتیكی بەكاریان هێناون، بۆیە لە هۆشیاری سیاسی كوردی بێ متمانەییەك هەیە تەنیا ئەو حاڵەتە نەبێت كە كۆی كوردستانی گەورە لەسەر نەخشەی رۆژهەڵاتی ناوەڕاستی نوێ بێت.
ئەمڕۆ هەینی شەشی ئادار رۆژنامەی
عەرەبی جەدید وتارێكی بڵاوكردووەتەوە كە لە لایەن نووسەری عەرەب فارس خەتاب بە ناونیشانی "كوردی ئێران و ئەزموونی سووری" نووسراوە. لە سەرەتادا نووسەر ئاماژە بۆ ئەو زانیارییانە دەكات، كە دەڵێن ئەمەریكا پشتیوانی كورد دەكات بۆ ئەوەی راپەڕینێكی چەكداری لەناو ئێران ئەنجام بدەن. نووسەرەكە پێیوایە ئامانجی سەرەكی واشنتن لەو كارەدا ئەوەیە بەرەیەكی ناڕەزایی چەكدارانە لە ناوخۆی ئێران بكاتەوە و بە كورد دەست پێ بكات.
بەڵام بە بڕوای ئەو ئەم پێشنیارەی واشنتن بەر پرسیارێكی سەرەكی دەكەوێت كە لە ئاگایی و هۆشیاری سیاسەتی كورد بوونی هەیە: بۆچی دەبێت كورد جارێكی تر متمانە بە واشنتن بكەن، دوای ئەو هەموو ئەزموونەی بەوە كۆتایی هات كاتێك هاوكێشەی نێودەوڵەتی دەگۆڕێت پشتیان لێ دەكات؟
فارس خەتابی نووسەر دواتر لە وتارەكەی باس لەوە دەكات مێژووی كورد لەگەڵ زلهێزەكان بە تایبەتیش ویلایەتە یەكگرتووەكانی ئەمەریكا، چەندان وانەی سەختی تێدایە. ئەو نووسەرە نموونە بە پێوەندی ئەمەریكا و مەلا مستەفا بارزانی دەهێنێتێتەوە، كە چۆن دواتر كاتێك سەدام حوسێن و شای ئێران لە 1975 رێككەوتنیان كرد ئەمەریكا پشتی لە كورد كرد.
هەروەها نموونەی دووەم نووسەر ئەزموونی رۆژئاوای كوردستانە، كە ئەمەیان چەند مانگێك لەمەوبەر بوو. دوای چەندان ساڵ كورد شەڕی لە دژی رێكخراوی تیرۆریستی داعش كرد، كەچی دواتر ئەمەریكا پشتی لە كورد كرد. بە بڕوای نووسەر ئەم ئەزموونانە بڕوای ئەوەی لەلای كورد سەلماندووە، كە "هاوپەیمانییە نێودەوڵەتییەكان لەگەڵ كورد كاتین و بەگوێرەی بەرژوەندییەكانن".
دواتر دەڵێ،"زۆرێك لە كورد درك بەوە دەكەن هێزە نێودەوڵەتییەكان زۆربەی جار وەك ئامرازێكی تەكتیكی مامەڵە لەگەڵ دۆزی كورد دەكەن لە ململانێیە گەورەكان، كاتێك بەرژوەندییەكان یەك دەگرن ئەوا پشتیوانی دەردەخەن، كاتێكیش بابەتە لە پێشینەكان دەگۆڕێن ئەوان بە خێرایی لە پشتیوانی پاشگەز دەبنەوە، ئەزموونەكان لە عێراق و لە سووریا ئەوەیان سەلماندووە هاوپەیمانە نێودەوڵەتییەكان لەگەڵ كورد ئەگەر بە دەگمەن نەبێت ئەوا نابێتە پابەندبوونێكی سیاسی هەمیشەیی".
لە بەشێكی تری وتارەكەدا هاتووە، "دەكرێت بگوترێ ئەزموونی سووری تەنیا وێستگەیەكی سەربازی نەبوو لە شەڕی دژ بە داعش، بەڵكو بووە وانەیەكی سیاسی قووڵ لە سنووری پشتبەستن بە زلهێزەكان. ئەو ئەزموونە دەری خست، پشتیوانی دەرەكی هێزێكی سەربازی یان دەسەڵاتێكی كاتی دەبەخشێت، بەڵام مەرج نییە پرۆژەیەكی سیاسی درێژخایەن دەستبەر بكات".
لە كۆتایی وتارەكە نووسەر پێیوایە تەنیا كاتێك كورد متمانە بە دەوڵەتە زلهێزەكان دەكات كاتێك كوردستانێكی كۆكراوەی هەموو پارچەكان شوێنی لە نەخشەی رۆژهەڵاتی ناوەڕاست نوێ هەبێت. فارس خەتاب لە وتارەكەی عەرەبی جەدید دەڵێ، "هەر قسەكردنێك لەبارەی هاندانی كوردی ئێران بۆ رووبەڕبوونەوەی راستەوخۆ لەگەڵ رژێمی ئێران لە ژێر چەتی پشتیوانی ئەمەریكا و هێزەكانی ناوچەكە، هەمیشە جێگی گومانێكی گەورە دەبێت لە ناو هۆشیاری سیاسی كورددا. چونكە مێژووی نزیك پرسیارێك دەخاتەڕوو ئەستەمە فەرامۆش بكرێت: ئەگەر واشنتن حسێبەكانی لەگەڵ هاوپەیمانەكانی لە سووریا گۆڕی، چ گرەنتییەك هەیە هەمان دیمانە لە ئێران دووبارە نەبێتەوە؟ مەگەر كوردستانێكی گەورە "كۆكراوە، لەسەر نەخشەی رۆژهەڵاتی ناوەڕاستی نوێ هەبێت".