بەیانی ئەمڕۆ لەلایەن فڕۆكەی ئیسرائیلەوە، هێرش كرایە سەر كەتیبەی ئیمام عەلی حەشدی شەعبی لە سنووری كەركووك، بەهۆی ئەو هێرشەوە 27 كوژراو و برینداریان هەیە.
ئەمڕۆ سێشەم 10ـی ئادار، هەژار رەشید پەیامنێری "وشە" لە كەركووك پێی راگەیاندین، بەیانی ئەمڕۆ سێشەم هێرشێكی ئاسمانی كرایە سەر بارەگای فەوجی 1 لیوای 40ی كەتیبەكانی ئیمام عەلی لە شارۆچكەی دووبز لە ڕۆژئاوای كەركووك.
زیاتر گوتی، بەهۆی ئەو هێرشە ئاسمانییەوە نۆ چەكدار كوژراون و 18 چەكداری تریش بریندارن، ئێستە گواستراونەتەوە نەخۆشخانە بەمەبەستی وەرگرتنی چارەسەر.
هاوكات حەشدی شەعبی لە بەیاننامەیەك لەبارەی ئەو هێرشە دەڵێت، ئەو هێرشە تەنیا بۆسەر گرووپ و لایەنێك نییە، بەڵكو هێرشێكی ئاشكرایە بۆ سەر عێراق
ئەوە لە كاتێكدایە ماوەی سێ ڕۆژە فڕۆكە جەنگییەكانی ئیسرائیل بەردەوام لە سنووری مووسڵ گرووپە چەكدارەكان بۆردمان دەكەن.
ماوەی 11 ڕۆژە شەڕی ئەمەریكا و ئیسرائیل لەگەڵ ئێران دەستی پێ كردووە، لەو شەڕەدا بەشێك لە گرووپە چەكدارەكانی عێراقیش چوونەتە ناو شەڕەكە، ئەمەیش وایكردووە قوربانی زۆر بدەن.