سعوودیە تووڕەیە هەڕەشەی پچڕاندنی پێوەندی كردووە
شاندی دیپلۆماسی سعوودیە لە 18ی مانگەوە عێراقیان جێهێشتووە
هێرشی میلیشیاكان بۆ سەر كەنداو لەوە زیاترە كە باس دەكرێت
لەوانە عێراق هاوشێوەی 1990 گۆشەگیر بكرێت
ماڵپەڕی حوڕەی ئەمەریكی ئاشكرای دەكات، بەرپرسانی سعوودیە هەڕەشەی پچڕانی پێوەندییان لە حكوومەتی عێراق كردووە، هەندێك لە چاودێرانی سیاسیش پێشبینی دەكەن بە هۆی هێرشی میلیشیاكان، سیناریۆی 1990 دووبارە دەبێتەوە و وڵاتانی كەنداو پێوەندیی لەگەڵ عێراق دەپچڕن.
ئەمڕۆ سێشەم 31ی ئادار،
ماڵپەڕی حوڕەی ئەمەریكی لە چەند سەرچاوەیەكی دیپلۆماسی ئاشكرای دەكات، شاندی دیپلۆماسی سعوودیە لە 18ی ئەم مانگەوە بەغدایان جێهێشتووە، دوای ئەوەی هوتێل رەشید لە بەغدا هێرشی كرایە سەر.
سەرچاوەیەكی دیپلۆماسی عێراق دەڵێ، "هەندێك ئاماژە لە سعوودیە و بە بەغدا گەیشتووە و باس لەوە دەكات، سعوودیە ئەو رێكارییانە توند دەكات بۆ ئەو عێراقییانەی دەیانەوێ بچنە سعوودیە، هەروەها ئاماژە بۆ ئەوە كراوە سعوودیە پێوەندیی خۆی لەگەڵ عێراق كەم دەكاتەوە، بەهۆی زیادبوونی هەژموونی میلیشیاكان بەسەر دامەزراوەكانی دەوڵەتی عێراقەوە".
سلێمان ئەنساری شارەزایەكی سعوودیە لە بواری پێوەندییە نێودەوڵەتییەكان، لە لێدوانێكی بۆ حوڕە دووپاتی دەكاتەوە، "ریاز تووڕەیە لەوەی لە عێراق روو دەدات". هۆكارەكەیش پێشێكارییەكانی میلیشیاكانە. سەرچاوەیەك لە چوارچێوەی هاوئاهەنگی بە ماڵپەڕەكەی راگەیاندووە، ئەو هێرشانەی لە عێراقەوە دەكرێتە سەر وڵاتانی كەنداو زۆرن، بەڵام زۆربەیان رانەگەیەنراون.
بۆیە هەندێك لە چاودێرانی سیاسی پێشبینی دەكەن عێراق هاوشێوەی 1990 لەلایەن وڵاتانی كەنداو گوشەگیر بكرێت، كە ئەوكات بەهۆی داگیركردنی كوێت بوو لەلایەن رژێمی سەدامەوە، بەڵام ئەمجارە بەهۆی میلیشیاكانەوە دەبێت. كەچی زەیدوون كینانی مامۆستا لە زانكۆی جورج واشنتن لە قەتەر لە لێدوانێكی بۆ حوڕە بە دووری دەزانێت ئەمە روو بدات، چونكە لە چەند ساڵی رابردوودا پێشكەوتن لە پێوەندییەكانی عێراق و كەنداو بەدی كراوە و لە بەرژەوەندی هیچ لایەكیان نییە ئەو پێوەندییە بپچڕێنن، بە تایبەتی لە بارودۆخێكی وەك ئێستە هەستیار.