مەسروور بارزانی سەرۆك وەزیرانی كوردستان رای گەیاند، ئەو لایەنانەی پەلاماری كوردستان دەدەن بەرانبەر خەڵك و خوا بەرپرسیارن، "ئێمە بە ئێرانمان گوتووە بەشێك نین لەو شەڕە و مەترسی نین".
سەرۆك وەزیرانی كوردستان سەرەخۆشی لە سەرۆك بارزانی و كەسوكاری شەهیدان و خەڵكی كوردستان كرد و رای گەیاند، ئەوەی دەستی بە خوێنی گەلەكەمان سوور بێت بە سزای خۆی دەگات و لەسەر ڕێی شەهیدان بۆ ئازادی گەلەكەمان دەڕۆین.
سەرۆك وەزیرانی كوردستان دوای بەشداری لە پرسەی شەهیدان "مووسا و مژدە" لە كۆنگرەیەكی رۆژنامەوانی گوتی، قەرەبووی خوێنی شەهیدان تەنیا بە ئازادی كوردستان دەبێت و ئەوەی زیانی مادی بەركەوتووە هەرچیمان پێ بكرێت دەیكەین.
سەرۆك وەزیرانی كوردستان روونی كردەوە، كە ئەوانەی توانایان هەیە رێگری لەو تیرۆریستانە بكەن هیچیان نەكردووە و ئەو هێرشانە لە زۆرشوێنەوە دەكرێت و توانای كوردستان سنووردارە.
مەسروور بارزانی سوپاسی پشوودرێژیی خەڵكی كوردستانی كرد و هیوای خواست ئەو ئاڵۆزییەی هەیە بەرەو كۆتایی بچێت.
هەروەها دووپاتی لەوە كردەوە، حكوومەتی عێراق هیچ هەنگاوێكی كردەیی بۆ راگرتنی ئەو هێرشانەی سەر هەرێمی كوردستان نەناوە.