ئەمڕۆ دووشەم 13ی نیسانی 2026، ئیبراهیم زولفەقاری گوتەبێژی قەرارگەی خاتەموئەلنبیای ئێران، ڕای گەیاند کە لە ئەگەری دەستپێکردنەوەی شەڕدا، وڵاتەکەی توانای سەربازیی نوێ ئاشکرا دەکات و دووپاتیشی کردەوە کە ئەم توانایانە "دوژمن هیچ پێشبینییەکی بۆیان نییە".
لە لێدوانێکدا زولفەقاری ئاماژەی بەوە دا کە ئێران، شێوازی جەنگیی وا ئاشکرا دەکات کە دوژمن توانایەکی ئەوتۆی نییە بۆ ڕووبەڕووبوونەوەیان، ئەوەشی خستە ڕوو کە زۆرێک لە توانا سەربازییەکانیان تا ئێستە ئاشکرا نەکراون.
ئەم لێدوانانە لە کاتێکدان کە گرژییە ناوچەیییەکان لە پەرەسەندندان و حاڵەتی چاوەڕوانی سەبارەت بە ڕێڕەوی ڕووبەڕووبوونەوە یان ئارامبوونەوە لە نێوان لایەنە پێوەندیدارەکان بەردەوامە، ئەمەش لە سێبەری هۆشدارییە نێودەوڵەتییەکان لە خزانی دۆخەکە بەرەو ئاڵۆزییەکی فراوانتر.