بەرپرسێكی باڵای ئێران ئاشكرای كرد، سەردانی سوپاسالاری پاكستان بۆ تاران، بووە هۆی كەمكردنەوەی ناكۆكییەكانی نێوان تاران و واشنتن لەبارەی چەند دۆسیەیەك و ئەگەری دانیشتنی دووەمی نێوان هەردوو وڵاتی زۆر زیاتر كردووە.
بەرپرسە باڵاكەی ئێران بۆ ئاژانسی
ڕۆیتەرز گوتوویەتی: سەردانەكەی عاسم مونیر چانسی درێژكردنەوەی ماوەی ئاگربەست و دانیشتنی دووەمی دانوستاندنەكانی زیاتر كردووە.
هێمای بۆ ئەوەیش كرد، سەرەڕای ئەوەی تا ئێستە ناكۆكیی قووڵ لەسەر پرسی بەرنامەی ناوكی ئێران هەیە، چونكە تا ئێستە چارەنووسی یۆرانیۆمی پیتێنراو تا ئاستی بەرز و كۆتوبەند لەسەر بەرنامەی ناوكی ئێران یەكلا نەبووەتەوە.
لە بەشێكی تری قسەكانی ئەو بەرپرسە باڵایەی ئێران ڕای گەیاند، هیوا هەیە ئاگربەست درێژ بكرێتەوە و گەڕی دووەمی دانوستاندنەكان لەگەڵ واشنتن ئەنجام بدەین.
تا ئێستە وادەی دانیشتنی دووەم و درێژكردنەوەی ئاگربەست لە نێوان ئێران و ئەمەریكا بڕیاری كۆتایی لەسەر نەدراوە، بەڵام هەوڵەكان بەردەوامیان هەیە و بڕیارە سبەی هەینی عاسم مونیر سوپاسالاری پاكستان بگاتە واشنتن، هەوڵی نزیككردنەوەی هەردوو وڵات بۆ دەستكردنەوە بە دانوستاندنەكان بدات.
ڕۆژی شەمووی ڕابردوو 11ی نیسان/ئەپریل، گەڕی یەكەمی دانوستاندنی نێوان ئێران و ئەمەریكا لە ئیسلام ئاباد ئەنجام درا، دوای زیاتر لە 20 سەعات گفتوگۆ و دانوستاندن، دواجار بێ هیچ ئەنجامێك دانوستاندنەكان كۆتاییان هات.