شاژنی بەلجیكا بە سەرۆكایەتیی شاندێكی باڵای وڵاتەكەی، سەردانێكی پێنج رۆژە بۆ توركیا دەست پێ دەكات، كەنەكە پەیامێكی بۆ شاژن نارد و داوای لێ كرد لە سەردانەكەیدا، سەرنج بخاتە سەر پرۆسەی ئاشتی و بەلجیكا ڕۆڵی كارا بگێڕێت لە بەرەوپێشچوونی پرۆسەكە و هەنگاونانی كۆنكرێتی.
بەگوێرەی ماڵپەڕی فەرمی وەزارەتی دەرەوەی توركیا، شاندەكەی بەلجیكا ئەمڕۆ یەكشەم 10ی ئایاری 2026 دەگاتە توركیا، تاوەكو رۆژی پێنجشەم لە هەردوو شاری ئەنكەرە و ئیستانبوڵ، زنجیرەیەك دیدار و كۆبوونەوەی ئاستبەرز دەكەن.
شاژن ماتیڵد لەم سەردانەدا تەنیا نییە، ژمارەیەك لە بەرپرسانی باڵای حكوومەتی بەلجیكا یاوەریی دەكەن، لەوانە ماكسیم پرێڤۆت جێگری سەرۆك وەزیران و وەزیری دەرەوە. تیۆ فرانكێن وەزیری بەرگری و بازرگانیی دەرەوە. سەرۆك وەزیرانی هەرێمەكانی (بروكسل، فلاندێرز و والۆنیا)، شاندێكی ئابووری كە لە زیاتر لە 400 نوێنەری كەرتی تایبەت پێكهاتووە.
كۆنگرەی نەتەوەیی كوردستان (كەنەكە) لە بەیانێكیدا داوای لە شاژن كردووە، لە سەردانەكەی بۆ توركیا سەرنج لەسەر كێشە ناوخۆییەكانی وڵاتەكە بدات و باسی پرۆسەی ئاشتیی كورد و تورك بكات.
كەنەكە دەڵێت، پرسەی ئاشتی كورد و تورك دەرفەتێكی بەنرخە بۆ كۆتاهێنان بە ململانێیەك كە چەندان دەیەیە بەردەوامە، كاریگەرییەكی قووڵی كردووەتە سەر توركیا و گەلی كورد، ڕۆژهەڵاتی ناوەڕاست و ئەوروپاش.
كەنەكە پێی وایە كە نابێت ئەم پرۆسەیە بە هەستیاری و نافەرمی بمێنێتەوە، یان تەنیا پشت بە هاوسەنگییە سیاسییە ناوخۆییەكانی توركیا ببەستێت، بەڵكو دەبێت لە ڕێگەی هەنگاوی كۆنكرێتییەوە بەهێز بكرێت، لە چوارچێوەی گەرەنتییە سیاسی و یاساییەكاندا دابڕێژرێت و لەلایەن ئەكتەرە نێودەوڵەتییە جێگەی متمانەكانەوە پشتگیری بكرێت.
بەبۆچوونی كەنەكە لەو چوارچێوەیەدا، بەلجیكا دەتوانێت ڕۆڵێكی گرنگ بگێڕێت. وەك دەوڵەتێكی ئەندام لە یەكێتیی ئەوروپا، وڵاتی میوانداری دامەزراوە ئەوروپییەكان و دەوڵەتێك كە پابەندە بە دیالۆگ، یاسای نێودەوڵەتی، دیموكراسی و چارەسەری ئاشتییانەی ململانێكان، بەلجیكا بەرپرسیارێتییەكی تایبەتی لەسەر شانە.
سەردانی بەڕێزتان بۆ توركیا لە كاتێكدایە كە چاوەڕوان دەكرێت پێوەندییەكانی نێوان بەلجیكا و توركیا، لە چەندان بواری جیاوازدا قووڵتر ببنەوە، بەتایبەتی لە بوارەكانی هاوكاری ئابووری، دیپلۆماسی، پیشەسازی و تەناهی.
ئێمە لە گرنگیی ئەم پێوەندییە دووقۆڵییانە تێدەگەین، بەڵام لەو بڕوایەداین كە هاوبەشییەكی بەردەوام لەگەڵ توركیا، ناتوانرێت لە پرەنسیپە بنەڕەتییەكانی دیموكراسی، سەروەریی یاسا، ڕێزگرتن لە مافەكانی مرۆڤ و چارەسەری ئاشتییانەی پرسی كورد جیا بكرێتەوە.
بۆیە بەوپەڕی ڕێزەوە داوا لە دەسەڵاتدارانی بەلجیكا دەكەین، لە كاتی ئەم ئەركەدا، ئەم بابەتە بە ڕوونی لەگەڵ هاوتا توركەكانیان بخەنە ڕوو. پێویستە بەلجیكا هانی توركیا بدات بۆ پاراستنی ئەم پرۆسەیە و وەرگێڕانی بۆ پێشكەوتنی سیاسیی ڕاستەقینە، هەروەها گەرەنتیكردنی مافە بنەڕەتییە سیاسی، كولتووری و زمانەوانییەكانی گەلی كورد.