ئەحمەد شەرع و دۆناڵد ترەمپ پێوەندییەکی تەلەفۆنییان ئەنجام دا

لە بەیاننامەیەکی سەرۆکایەتیی سووریادا هاتووە، هەردوو سەرۆک لە میانی پێوەندییەکەدا تاوتوێی پێوەندییە دووقۆڵییەکان و پێشهاتەکانی دۆخی ناوچەکەیان کرد، هەروەها باسیان لە ڕێگەکانی بەهێزکردنی هاوئاهەنگیی هاوبەش کرد بە شێوەیەک کە پاڵپشتی لە سەقامگیریی سووریا بکات و بەشداری لە بەرەوپێشبردنی ڕێڕەوی بووژانەوەی ئابووری لە قۆناغی داهاتوودا بکات.

بەپێی بەیاننامەکە، شەرع لە پێوەندییەکەدا دووپاتی لە گرنگیی بەردەوامبوونی پاڵپشتیی نێودەوڵەتی بۆ سووریا لە قۆناغی ئاوەدانکردنەوە و بووژانەوەدا کردەوە، ئاماژەی بەوەش دا کە هەڵگرتنی ئەوەی ماوەتەوە لە سزاکان، هەنگاوێکی سەرەکییە بۆ ئەوەی ئابووریی سووریا بتوانێت چالاکییەکانی بەدەست بهێنێتەوە و بارودۆخی بژێویی هاووڵاتییان باشتر بکات، کە ئەمەش هاندەر دەبێت بۆ وەبەرهێنان و ڕەخساندنی ژینگەی گونجاو بۆ گەڕانەوەی پڕۆژە ئابووری و گەشەپێدانەکان بۆ ناو کەرتە گرنگە جیاوازەکان.

هەروەها هەردوولا باسیان لە دۆخی تەناهیی ناوچەکە و ئەو ئاڵەنگارییانە کرد کە بەهۆی گرژییە هەرێمییەکانەوە دروست بوون، شەرع دووپاتی لە گرنگیی زاڵکردنی ڕێڕەوی دیپلۆماسی و گفتوگۆ کردەوە بە شێوەیەک کە بەشداری بکات لە بەهێزکردنی ئاسایش و ئاشتیی هەرێمی و ناوچەکە لە هەڵکشانی زیاتر بپارێزێت.

لە لای خۆیەوە و بەپێی ئەوەی سەرۆکایەتیی سووریا بڵاوی کردووەتەوە، ترەمپ گرنگیدانی خۆی بۆ بەدواداچوونی پێشهاتەکانی سووریا و ناوچەکە دەربڕی، و دووپاتی لە گرنگیی پاراستنی سەقامگیری و پاڵپشتیکردنی ڕێڕەوی بووژانەوە و ئاوەدانکردنەوەی سووریا کردەوە.

لە کۆتایی پێوەندییەکەدا، هەردوولا دووپاتیان لە گرنگیی بەردەوامیی پێوەندی و هاوئاهەنگی و بەدواداچوون بۆ ئەو دۆسیانە کردەوە کە جێی بایەخی هاوبەشن، بە شێوەیەک کە لە خزمەتی بەرژەوەندیی هەردوو وڵاتدا بێت و بەشداری بکات لە پاڵپشتیکردنی ئاسایش و سەقامگیری لە ناوچەکەدا.