لەناو شەڕ و ئاڵۆزییەكانی ناوچەكە كە بەشێك لە شارەزایان بە گۆڕانكاری لە هاوسەنگی هێز لە ناوچەكە لێكی دەدەنەوە، عێراقییەكان، بەتایبەتی سیاسەتوانان، چاودێریی دۆخەكە و زانینی كاریگەریی رێككەوتن یان رێكنەكەوتنی ئەمەریكا و ئێران لەسەر دۆخی وڵاتەكەیان دەكەن، كە بە بەردەوام گۆڕەپانی ململانێی ئەو دوو هێزە ناوچەیی و نێودەوڵەتییە بووە.
لە دوای رووخانی رژێمی پێشووی عێراق، ئێران لە رێگەی هێزە سیاسی و میلیشیا شیعەكانەوە رۆڵێكی گەورەی لە عێراق هەبووە و دەسەڵات و دەسترۆیشتوویی هەبووە، بەڵام لە دوای هەڵمەتە سەربازییەكانی ئەمەریكا و ئیسرائیل بۆ سەر ئێران و لاوازبوونی توانا سەربازییەكان و ئەو گورزانەی بەر میلیشیاكانی لە ناوچەكە كەوت، ئاخۆ ئێستە دەسەڵاتی ئێران لە عێراق لە چ ئاستێكدایە؟
سەرچاوەیەكی نزیك لە میلیشیاكان ئاماژە دەكات كە ئێران لە رووی ستراتیجییەوە لە عێراق بە دەسەڵات و باڵادەستە، لە ماوەی دوو دەیەی رابردوو دەركەوت كە ئێران بە وردی دەزانێت كە چی لە عێراق دەوێت، بە پێچەوانەی شپرزەیی ئەمەریكا، بۆیە پێم وایە ئەو دۆخە بەردەوام دەبێت، تەنانەت لە دوای واژووكردنی رێككەوتنی ئەمەریكا و ئێران، پێم وایە ئێران لە دوای رێككەوتنەكە ئاكارێكی جیاواز و رانەگەیەندراو پێڕەو دەكات كە ئەمەریكا توڕە نەكات، بەڵام دەسەڵاتی لە عێراق دەمێنێتەوە، ئەوەش لە رێگەی ژمارەیەك كەسایەتی و حزبەكانی نزیك لە خۆیەوە.