ئەمڕۆ دووشەم 29ی حوزەیرانی 2026، فەرماندەیی ناوەندیی ئەمەریکا (سێنتکۆم) بوونی زیاتر لە 50 هەزار سەربازی هێزەکانی ئەمەریکای لە سەرانسەری ناوچەی ڕۆژهەڵاتی ناوەڕاست ڕاگەیاند، هاوکات دووپاتی کردەوە کە لەوپەڕی ئامادەباشی و وریاییی هەمیشەییدان.
سێنتکۆم لە ڕاگەیەنراوێکدا ئاماژەی بەوە دا کە ئەدمیراڵ براد کوپەر فەرماندەی فەرماندەیی ناوەندیی ئەمەریکا، لە میانی سەردانەکەیدا بۆ ڕۆژهەڵاتی ناوەڕاست، گفتوگۆی لەگەڵ گەورە بەرپرسانی مەدەنی و سەربازی لە ئیسرائیل و لبنان ئەنجام داوە.
زیاتر گوتی، کوپەر و تیمەکەی لە لبنان لەگەڵ جۆزێف عۆن سەرۆکی لبنان و عیماد ڕۆدۆڵف هێکل فەرماندەی سوپای ئەو وڵاتە کۆ بوونەتەوە. ڕوونی کردەوە کە سەرکردەکان تاوتوێی هەنگاوەکانی داهاتوویان کردووە بۆ جێبەجێکردنی ئەو ڕێککەوتنە مێژووییە چوارچێوەیییەی کە ڕۆژی هەینیی ڕابردوو لە واشنتن واژوو کرابوو. هەروەها کوپەر سەردانی هێزە بڵاوەپێکراوەکانی ئەمەریکای لە ئیسرائیل کردووە، و ستایشی ئاستی ئەندامە دیارەکانی کردووە وەک پێزانینێک بۆ بەشدارییە ناوازەکانیان لە بەجێگەیاندنی ئەرکەکان.
ئەمە دوای چەند سەعاتێک دێت لە قسەی بەرپرسێکی وەزارەتی دەرەوەی ئەمەریکا کە ڕای گەیاندبوو، ستیڤ ویتکۆف و جارد کوشنەر نێردراوانی سەرۆکی ئەمەریکا، ڕاپۆرتێک دەربارەی ڕێککەوتنەکەی لەگەڵ ئێران پێشکەش بە هەردوو ئەنجوومەنی نوێنەران و پیرانی ئەمەریکا دەکەن.