د بەردەوامیا بوردمان و توپخانەیێن سوپایێ تورکیا، ئاگر ب چەند جهـ و دەڤەرێن جودایێن پارێزگەها دهۆکێ کەفتیە، بڤێ یەک ژی هزاران دونەمێن ئەردی هاتینە سوتن و زیانێن زۆر ب رەز و بیستان و ئاژەلدار و ژینگەها دەڤەرێ کەفتیە.
مێهڤان زێباری، وەلاتیەکێ گوندێ کادان یا سەر ب دەڤەرا زێبارێ ل دینارتە بو "وشە" گوت، ددەما ئەڤ سالەدا پتر ژ دەهـ جاران گوندێن دەڤەرا دینارتە و زێبارێ ژلایێ بالەفرێن تورکیا هاتینە سوتن، مخابن زیانێن زۆر ژی ل پشت خوە هێلاینە، تایبەتی ل دارستان و ژینگەهێ، زێدەباری کو زیان گەهشتیە رەز وبیستانێن وەلاتیان ژی.
هوگر عەلی، وەلاتیەکێ گوندێ گەلەکا یا سەر ب ناحیا دێرەلوکێ یە بۆ "وشە" گوت، چەند رۆژێن بوری ب ئەگەرێ بۆردمانێن تورکیا ئاگرەکێ مەترسیدار ب ژینگەهـ و دارستانا هەر ئێک ژ گوندێن گەلەکا، مەهیدێ و سپیندارێ کەفت، مخابن هزاران دونەمێن ئەردی و دارستانان سوتن، زیانێن زۆر ژی ب خودان تەرش و کەوالان کەفت، پێشت ژی چەندین جاران ئاقارێ دەڤەرێ هاتیە سوتن ژ لایێ بالەفرێن تورکیا، یا ژ هەموان نەخشتر ژ چو کەس نەشێن ئاگری ڤەمرینن.
زکری بەرواری، موختارێ ئێک ژ گوندێن دەڤەرا بەرواری ژێری یە ل سنورێ ناحیا چەمانکێ بۆ وشە گوت، ئەڤ سالە پتر ژ پێنج جاران ب ئەگەرێ بوردمانێن تورکیا ئاگر ب ئاقارێ چەندین گوندێن بەرواری ژێری کەفتیە، هزاران دونەمێن ئەردی و دەهان رەز و بیستانێن وەلاتیان سوتینە، زیانێن هەری زۆر ب دارستان وژینگەهـ و پوش و پاوانێ دەڤەرێ کەفتیە.
کوڤان نهێل، وەلاتیەکێ دەڤەرا نهێل یا سەر ب ئامێدیێ یە بو "وشە" گوت، چەند رۆژێن بوری هزاران دونەمێن ئەدی یێن گوندێ گوهەرز، بەرچی، بلاڤە، سەرگەلێ و سگێرێ ب ئەگەرێ بوردمانێن بەردەوام یێن سوپایێ تورکیا هاتنە سوتن، ژبلی زیانێن ژینگەهی و سوتنا دارستان و پوش و پاوانی، هەڤدەم زیانێن زور ژی ب رەز و بیستانان سوتن کو رەنجا چەندین سالێن کارکرنێ بویە ژلایێ خەلکی ڤە، جهێ داخێ یە ژبەر نەبونا ئامیرێن پێدڤی کونترولکرنا ئاگری ژی یا زەحمەت بویە.
رەمەزان سیاری،ژ هێزا پاراستنا ژینگەهێ ل دهوکێ بۆ "وشە" گۆت، ئەڤ سالە ب ئەگەرێ بالەفر و توپخانەیێن تورکیا چەندین روودانێن ئاگری یێن مەترسیدار بۆ سەر ژینگەهـ و دارستان وپوش و پاوانێ دەڤەرێ هاتیە ئەنجامان، ژبلی سوتا هزاران دونەمێن ئەردی، هەڤدەم زیانێن مادی ژی ب وەلاتیان و خودان ئاژەلان کەفتیە، زێدەباری کو چەند وەلاتی و،پێشمەرگە ی برینداربوینە ب ئەگەرێ هندێ کو کار بۆ کونترلکرنا ئاگری دکر.
ژبلی دەڤەرێن ل سەری ئاماژە پێکری، هەڤدەم هەر ئێک ژ دەڤەرێن گولی، دەڤەرا نێروەورێکان و چەندین دەڤەرێن دن ژی ل سنورێ پارێزگەها دهوکێ و ئیدارا سەربخوەیی یا زاخۆ کەفتینە بەر ئاگربەربوونێ ب ئەگەرێ بالەفرێن تورکیا.
ل سنورێ پارێزگەها دهۆکێ پتری 500 گوند ژ ئەگەرێ شەرێ تورکیا و پەکەکێ هاتینە چۆلکرن کو رێژا پتری 25%ێ ژ ئاخا پارێزگەها دهۆکێ بخوڤە دگریت.