مەسروور بارزانی بە بۆنەی ڕۆژی جیهانیی كرێكاران، پەیامێكی بڵاو كردەوە رای گەیاند، حكوومەتی هەرێمی كوردستان لە ساڵانی ڕابردوودا، هەوڵی زۆری داوە و كاری كردووە لە پێناو باشتركردنی دۆخی ژیانی كرێكاران و پاراستنی مافەكانیان.
ئەمڕۆ پێنجشەم یەكی ئایار، لە پەیامێكی مەسروور بارزانی سەرۆك وەزیرانی كوردستاندا هاتووە، بە بۆنەی ڕۆژی جیهانیی كرێكاران، گەرمترین پیرۆزبایی لە گشت كرێكارانی كوردستان و عێراق و جیهان دەكەم.
سەرۆكی حكوومەت دەڵێت، ڕێز و پێزانینێكی زۆرم بۆ ماندووبوون و ئەرك و بەشداریی كارای كرێكارانی كوردستان لە پرۆسەی ئاوەدانكردنەوە و گەشەپێدان و بنیاتنانی ژێرخانی ئابووریی هەرێمی كوردستاندا هەیە.
باسی لەوەش كردووە، حكوومەتی هەرێمی كوردستان لە ساڵانی ڕابردوودا، هەوڵی زۆری داوە و كاری كردووە لە پێناو باشتركردنی دۆخی ژیانی كرێكاران و پاراستنی مافەكانیان، لەم ڕووەشەوە پابەندبوونی خۆمان بە داكۆكیكردن و دابینكردنی مافەكانی كرێكاران لە ڕووی تەندروستی و سەلامەتیی پیشەیی و مافە یاساییەكان و باشتركردنی هەلومەرجەكانی كاركردنیان، دووپات دەكەینەوە.
لە كۆتایی پەیامەكەیدا هاتووە، ڕۆژی جیهانیی كرێكاران پیرۆز بێت و هیوادارم هەمیشە مافەكانیان پارێزراو بێت و تەندروست بن.