ئەمڕۆ یەكـی ئایار ڕۆژی جیهانیی كرێكارانە، كە بەیەكێك لە یادە هەرە بەربڵاوەكان هەژمار دەكرێت لە سەرانسەری دنیادا، چونكە لە 132 وڵات ساڵانە بۆنەی تایبەت ڕێكدەخرێت و یاد دەكرێتەوە، لە بەشێك لە وڵاتانیش دەكرێت بە پشووی گشتی، بەڵام لە سعوودیە و عومان و ئەفغانستان، بەهیچ شێوەیەك ئەو ڕۆژە وەك ڕۆژی كرێكاران ددانی پێدا نەنراوە و نە پشووە و نە هیچ بۆنەیەكیش بۆ ڕێزگرتن لە كرێكاران ڕێكدەخرێت.
ئەمڕۆ لە هەرێمی كوردستان و عێراقیش بەبۆنەی یەكی ئایارەوە لە تەواوی دامەزراوەكانی حكوومەت پشووی فەرمییە.
بەپێی داتایی یەكێتیی سەندیكاكانی كرێكارانی كوردستان لە هەرێمی كوردستان لە بەڕێوەبەرایەتیی گشتیی دەستەبەری كۆمەڵایەتیی زیاتر لە 194 هەزار كرێكار تۆماركراون، لەو ژمارەیە 134 هەزاریان كرێكاری ناوخۆیی پیاون، 30 هەزار كرێكاری ناوخۆیی ئافرەتن، هاوكات 23هەزار كرێكاری بیانی تۆمار كراون.
لە ئەنجامی خەبات و ناڕەزایەتیی فراوانی كرێكارانی ئەمەریكا، دوو سەدە لەمەوبەر و لە ساڵی 1886ـدا، مانگرتنی گەورەی كرێكاران لە شاری شیكاگۆ دژی سیستمی كار و خاوەنكارەكان، بۆ دەستەبەركردنی مافەكانی كرێكار و كەمكردنەوەی كاتی كاركردنی كرێكار بۆ هەشت سەعات رووی دا، تێدا حەوت كرێكار بە دەستی ھێزەكانی پۆلیس كوژران، ئەم هاوارە بوو بە جووڵانەوەیەكی كرێكاریی خۆڕسك لە دنیادا و پەلی هاویشت بۆ ئەوروپا و خۆرهەڵاتی ناوەڕاست.
دواجار لە ساڵی 1889 سەرۆكی سەندیكای كرێكارانی ئەمەریكا لە كۆنگرەیەكدا كە لە پاریس ئەنجام درا، داوای یەكخستنەوەی شۆڕشی كرێكارانی كرد لە دنیادا، بۆ ئەوەی سەعاتەكانی كاركردن كەم بكرێتەوە بۆ هەشت سەعات لە ڕۆژێكدا، لەو كۆنگرەیەشدا بڕیاریان دا كە وەڵامی ئەو داخوازییە بدەنەوە لە ڕێگەی ئەنجامدانی خۆپێشاندانێكی سەرانسەریی جیهانیی لە یەكـی ئایاری ساڵی 1890، بەو هۆیەشەوە ئەو ڕۆژە بە ڕۆژی جیهانیی كرێكاران ناسێنرا.