ب مەرەما نوژنکرن و ڤەکرنا جاددێن چەند گەرەکێن دهۆکێ، بۆ دەما سێ روژان ئاڤا 24 گەرەکێن سەنتەرێ باژێرێ دهۆکێ و دەورۆبەران دێ هێتە برین، ئاڤا دهۆکێ ژی ددەت دیارکرن کو پێدڤی یە وەلاتی دەست ب کێم مەزاختنا ئاڤێ بکەن.
رێڤەبەریا ئاڤا پارێزگەها دهۆکێ دیارکر کو ئەڤرۆ دێ ئاڤا چەند گەرەکێن دهۆکێ هێتە برین و بۆ "وشە" گوت، د نوکە دا رێیا گەرەکا تەناهی بۆ زرکا دهێتە نوژەنکرن، بوریا سەرەکی یا ئاڤا دهوک و سێمێل ژی دکەڤیتە سەر وێ رێکێ، لەوا داکو کرێکار و کارێ ل سەر وی پروژەی بشێن کارێ خۆ بکەن، پێدڤی یە ئاڤ بهێتە راوستاندن، لەوا هەر ژ ئەڤرۆ دێ ئاڤ هێتە گرتن.
زێدەتر گوت، ئاڤا 24 گەرەکێن سەنتەرێ باژێرێ دهۆکێ و دەورۆبەران دکەڤیتە سەر وێ بوریێ و دێ بۆ دەما سێ رۆژان هێتە گرتن، دڤان سێ روژان دا دڤێت وەلاتی کێم مەزاختنا ئاڤێ بکەن بۆ هندێ تێرا وان بکە.
ئەو گەرەکێن کو دێ ئاڤا وان هێتە راگرتن پێکدهێن ژ نزارکێ هەتا گوندێ گەڤەرکێ، بەروشکێ، رەزا، مهاباد، زرکا و کومەڵگەها زرکا، کێڤلا، هەردوو ماسیکا، ماسیکا کادرا، شاخکێ شەش، مالتا ئیسلام، مالتا ژووری، مالتا ژێری، دێرین ستی، گوندێ زانکو، مالتا کادرا، مالتا نەسارا، میدیا، پارچێن ماموستایێن زانکو ، دیاری، گوندێ ماسیکێ، تەناهی، ئەڤرو ستی و حەوشکێ.