پۆلیسی سلێمانی رای گەیاند، كەسێكمان لە سلێمانی گرت كە بڕی 150 ملیۆن دینار و بڕێك زێڕی لە ماڵێكدا دزیبوو.
بەپێی راگەیەنراوی پۆلیسی سلێمانی، دوای ئەوەی هاووڵاتییەك لە نووسینگەی ناوبازاڕی بەشی پۆلیسی نەهێشتنی تاوان، سكاڵای تۆمار كرد كە زیاتر لە 150 ملیۆن دینار و بڕێك زێڕی لە ماڵەكەیدا لە یەكێك لە گەڕەكەكانی سلێمانی لێ دزراوە، دادوەر بڕیاری دا بۆ لێكۆڵینەوە و گرتنی تۆمەتبار.
پۆلیس دەڵێت: مەفرەزەكانی نووسینگەی ناوبازاڕی بەشی پۆلیسی نەهێشتنی تاوانی سەربە بەڕێوەبەرایەتیمان، لێكۆڵینەوە و بەدواداچوونەكانیان دەست پێ كرد و توانرا تۆمەتبار بدۆزرێتەوە و بگیرێت.
بەگوتەی پۆلیسی سلێمانی جگە لە گرتنی تۆمەتبار، تەواوی پارە و زێڕە دزراوەكانیش دەستیان بەسەردا گیراوە.
پۆلیس ئاماژەی بەوەش كردووە، تۆمەتبار (س، م، أ) بەبڕیاری دادوەر و بەپێی مادەی 446 لە یاسای سزادانی عێراقی راگیراوە، لێكۆڵینەوە لە كەیسەكە بەردەوامە.