بەڕێوەبەری گشتیی خانەنشینی هەرێمی كوردستان رای گەیاند، كە ئەمڕۆ موسەنا ئەمین پەرلەمانتاری عێراق لە فراكسیۆنی یەكگرتووی ئیسلامی سەردانی بەڕێوەبەرایەتییەكەی كردووە و هەڕەشەی لە فەرمانبەران كردووە.
ئەمڕۆ یەكشەم 22ی حوزەیران، مریەم عوسمان بەڕێوەبەری گشتی خانەنشینی هەرێم لە روونكردنەوەیەكدا رای گەیاند، ئەمڕۆ پەرلەمانتاری یەكگرتوو موسەننا ئەمین بۆ كاری خێزانی سەردانی بەڕێوەبەرایەتی ئێمەی كردووە و كاتێك هاتووەتە ژوورەوە یەكەم قسەی ئەوە بووە بۆ ئێمە لەبەر دەرگا پێشوازیمان لێی نەكردووە.
ئاماژەی بەوەیش كردووە كە وەك بەرچاوڕوونی بۆ موسەننا ئەمین و هاوسەرەكەی كە هەڕەشەی لە فەرمانبەرەكانمان كردووە "من كەسێكی ئیشكەرو خزمەتگوزارم و ئەو كاتەی بۆ پێشوازی و ڕەسمگرتن و خۆ نواندنی دەیكوژم، 10 بۆ 15 فایلی خەڵكی هەژار و خانەنشینی پێ تەواو دەكەم".
" تۆ پەرلەمانتاری عێراقیت و تەنانەت ئەگەر نیەتیشت بێت كە نەتبووە، بۆ بەدواداچوون بۆت نییە بێیتە لای ئێمە و ئێمە لە بەردەم پەرلەمانی كوردستان بەرپرسین و دەرگامان كراوەیە ئەویش بە ڕێ و شوێنی پەرلەمانی كە پێڕەوی ناوخۆی پەرلەمان دیاریكردووە" مریەم عوسمان وا دەڵێ.
هەروەها دەڵێ، كاری خێزانی خۆتان بەكوردایەتی بە خەڵك مەفرۆشن و لەدیدی ئێمەوە وەرگێڕی ئەوانەن كە خەڵكی كوردستانییان بێ مووچە كردووە، ژنێكی بەتەمەنی خانەنشین و مامە حاجییەك لە خزمەت و بەدەمەوە چوونی ئێمە ڕازی بن، كە بەسەرچاو خزمەتییان دەكەین، بۆمان گرنگ نییە وەرگێڕێكی مووچەبڕان چۆن قسەمان لەسەر دەكات.