بزووتنەوەی گۆڕان لە نوێترین هەڵوێستیدا بە توندی ڕەخنە لە بڕیاری وەزارەتی دارایی عێراق دەگرێت بۆ ڕاگرتنی مووچەی فەرمانبەرانی هەرێمی کوردستان و بە "بڕیارێکی سیاسی و نادەستووری دژی خەڵکی کوردستان" وەسفی دەکات.
ئەمڕۆ پێنجشەم سێی تەمووزی2025، لە کۆبوونەوەی جڤاتی نیشتمانیی بزووتنەوەی گۆڕاندا کە لە سلێمانی "گەڕەكی كوردسات" بەڕێوەچوو، دووپات لەوە کرایەوە کە نابێت چیتر مووچە وەک کارتی فشار و ململانێی سیاسی بەکاربهێنرێت و خەڵکی کوردستان باجی کێشە سیاسییەکان بدات.
لە کۆبوونەوەکەدا کە بە سەرپەرشتیی ڕێکخەری گشتی " دانا ئەحمەد مەجید" بەڕێوەچوو، ئاماژە بەوە کرا کە ڕاگرتنی مووچە لەلایەن حکوومەتی فیدراڵییەوە بارگرانییەکی زۆری لەسەر ژیانی فەرمانبەرانی هەرێم دروست کردووە. بۆیە داوا کرا کێشەکە بەپێی دەستوور و بڕیارەکانی دادگای فیدراڵی چارەسەر بکرێت، نەک بە بڕیاری سیاسی کە ئامانج لێی سزادانی خەڵکی کوردستانە.