جێگری نەقیبی سەندیكای ڕۆژنامەنووسانی عێراق رای گەیاند، ئەوانەی گرەو لەسەر هەڵوەشاندنەوە و نەمانی پێوەندییەكانی نێوان كوردستان و عێراق دەكەن، شكستخواردوون و بەو ئامانجەیان ناگەن.
ئەمڕۆ پێنجشەم، 10ی تەمووزی 2025، محەمەد حەنوون، جێگری نەقیبی سەندیكای ڕۆژنامەنووسانی عێراق بە ناونیشانی "كوردستان لە دڵدایە، قەیران و ئاڵۆزییەكان ڕۆڵەكانی نیشتمان لێك ناكات" وتارێكی بڵاو كردووەتەوە و رای گەیاند، كوردستان لە ماوەی چەند ساڵی ڕابردوودا سەرباری هەموو بارودۆخە سەختەكان كە ڕووبەڕووی كراوەتەوە، بەڵام پێشكەوتوو و سەركەوتوو بووە و بووەتە نموونەیەكی درەوشاوەی شارستانی و ژیاری لە پەرەپێدان، وەبەرهێنان، ئاوەدانی، سەقامگیریی تەناهی و گەشتیاری.
هەروەها رەخنەی لەو میدیایانە گرتووە كە رووماڵی ناپیشەییانەیان بۆ رووداوەكانی چەند رۆژی رابردووی هەركییەكان كرد و دەڵێ، ناكرێت بە پشتتێكردن و ناوزڕاندنی بەهۆی چەند ڕووداوێكی لۆكاڵییەوە، هەوڵی بێڕێزیكردنی بدرێت و لە كەسایەتییەكەی كەم بكرێتەوە و لەكەدار بكرێن.
لە كۆتاییشدا گوتوویەتی، ئەوانەی گرەو لەسەر هەڵوەشاندنەوە و نەمانی پێوەندییەكانی نێوان كوردستان و عێراق دەكەن، شكستخواردوون و بەو ئامانجەیان ناگەن.