42 سالان بەری نوکە، د روژەکا وەکو ئەڤرۆ دا هەشت هزار نێرینەیێن بارزان ژلایێ رژێما بەعس د مالێن وان دا هاتنە ڕەڤاندن، پاشی ل بیابانێن عیراقێ هاتنە زیندانکرن و ئەزیەت دا، ژ سزا و ئەزیەتدانێ ژی نەراوستان، هەموو ب ساخی بن ئاخکرن، پرانیا ئەو زاروکێن کو ل وی دەمی هێشتا دزکێ دایکێن خودا بوون، دەمێ هاتینە دنیایێ، ب دایکێن خۆ دهێنە نیاسین ژبەرکو دایکێن وان ئەو بخودان و پەروەردەکرن.
حازم بلەی کو ب حازم سافیا بلەیی دهێتە نیاسین، ئێک ژ وان کورە جینوسایدکریێ بارزانی یە و ب دایکا خۆ دهێتە نیاسین بۆ "وشە" گوت، پشتی گرتن و برنا هەشت هزار توخمێ نێرینەیێ بارزانیان ل سالا 1983 ژلایێ رژێما بەعسا هەرفتی ل كومەلگەهێن قودس و قادسیە و بەحرك و هەریرو دیانا و جهێن دی ئاكنجی ببوون، هەمی بەر ب چارە نڤیسەكێ نەدیار برن، ل گەل هەرفینا ڕژێما بەعسا دیكتاتۆر چارەنڤیسێ وان ب دیاركەفت كو هەمی پشتی گرتنێ بۆ ماوەی هەیڤەكێ بەر ب باشوورێ عێراقێ هاتینە بڕێ كرن و ل قەزایا بوسەیە ل بیابانەكا هشك و توزاویدا ب دڕندەترین شێوە یێت هاتینە شەهید كرن و ب كومەل ئێخستیە ناڤ گورادا.
زێدەتر گوت، پشتی شەهیدكرنا مێرێن بارزانیان، دوژمن ب وێ چەندێ نەڕاوەستان، بەلکو ب نامروڤانەترین ڕەنگ ڕەفتار ل گەل دایك و بچویكێن وان كرن، اڤ و كەهرەبا لێ بڕین، گەلەك جارا وەنەدكر كەس ل كومەلگەهێ بچنە دەرڤە، ئەوێ هاریكاریا وان ژی كربا دا ب توندترین شێوە هێنە سزادان، بەر هندێ ئەڤ دایكە ناچاربوون بۆ خودان كرنا زاروکێن خۆ و پاراستنا كەڕامەتا خۆ مل ب ملێ مێرا بكەڤنە شولكرنێ بۆ درێژەدان ب ژیانا خۆ و پەیداكرنا پاریەنانەكێ بۆزارۆکێن خۆ، كو هندەك دایك هەبوون دوو تا سێ مال ب خودان دكرن . هەر چەندە وان دایكا زەحمەت و ئازارەكا زۆر دبینی، بەلێ لنك وان تشتەكێ ئاسایی بوو، چونكی سەربەرزی بۆ وان زۆر مەزنترو پیروزتر بوو ل وێ زەحمەتێ، ئەڤە سەربارێ وێ چەندێ كو ڤان دایكانە ب ڕۆژ کارو ئەرکێ بابینیێ دكرو ب شەڤ ژی وەک دایک بوون. لەوما ببوونە جیێ سوزو بەزەیێ و خوشەویستی بۆ بچویكێن خۆ، چونكی ڤان بچویكانە ژبلی دایكێ كەسەكێ دی نەبوو هەمبێزا خۆ بۆ ڤەكەن و پیچەك ل خەم وكوڤانێن وان ساڕێژ بكەن، یان پێدڤی و داخوازیێن وان بۆ جی بجی بكەن .
حازم سافیا د درێژاهیا ئاخفتنێن خودا دیارکر ژی کو زاروکێن وان دویر ل سوزا بابینیێ ل قوناغێن پر سەخت و دژوارێت ژیانێدا، ب هەمی كێماسی و نەخوشیاڤە ژلایێ دایكێن وان ب جوانترین شێوە هاتنە پەروەردەكرن و مەزن كرن هەتا گەشتنە قوناغا پێگەیاندنێ و گوت ژی، بو هندێ زاروک بهێنە نیاسین، ژبلی ناڤێ وی یان بابێ وی، پرانیا جاران ئەو زاروک ب ناڤێ دایکا خو هاتیە نیاسین و ئەز ئێكم ژ وان کەسان،
ئەڤە جهێ شانازیێ یە بۆ دایكان كو شیانە مەزنترین سەركەفتنێ ل مێژویێ دا تۆماربكەن، مخابن هەتا نوكە زۆر كێم ڕولێ ڤان دایكێن قاهرمانان هاتیە بەرچاڤ و شروڤەكرن، وەکو پێدڤی بەحسێ وان نەهاتیەکرن .
لەوما هیڤی دارین ل نڤیسەرو هونەرمەندو خودان هزرو پسپورێن گشتی و بوارێ ئافرەتێ ژ بۆ سەلماندنا ڕول و دەسەلاتا ئافرەتێ ل پێگەهاندنا نەڤیەك كاراو ژێهاتی، ب شروڤەك زانستیانە ڕۆلێ ڤان دایكانە وەك بەلگەهەك زیندی و سیستەمەكێ تازە ژبۆ بابینیێ بێخنە بەرچاڤ كرن و ناساندن و ل سیستەمێ پەروەردێ بهێنە خویندن، هەتا ئەركێ دایكێ دقادا خەباتا نەتەوایەتیدا بێتە بەرجەستەكرن و بۆهەتا هەتایێ ب شانازی بمینیت .
ئەڤرۆ ل گورستانا جینوسایدا بارزانیان رێورسیێن تایبەت بو ساخکرن و بیرئینانێ دهێنەکرن، کەسایەتی و کچ و کور و دایکێن جینوسایدا بارزانیان بەرهەڤبوینە.
بارزان، نەوزاد هلۆری: