ل ڤان چەند سالێن بوری، پشکەک ژ گوندێن سنورێ قەزا ئامێدیێ ژبەر شەرێ تورکیا و پەکەکێ زیانێن زۆر بەرکەفتنە و خانیێن وان هاتینە خراپکرن، د نوکە دا حکومەتێ دەست ب قەرەبوکرنا وان کریە.
رێبەر گیزی، رێڤەبەرێ ناحیا دێرەلۆکێ بو"وشە" گوت، ڤان چەند سالێن بوری ب ئەگەرێ شەرێ تورکیا و پەکەکێ زیان ب چەند گوندێن سنورێ ناحیا دێرەلۆکێ کەفتیە و پشکەک ژ خانیێن وەلاتیان هاتینە بوردمان کرن و گوند ژی هاتینە چولکرن و خەلکێ وان گوندان ئاوارە بوینە.
زێدەتر گوت، حکومەتا هەرێما کوردستانێ دەست ب ڤەدیتنێ بۆ زیانێن وان گوندان کریە و هەموو زیاندارێن وان گوندان ب گورەی زیانا بەرکەفتی دێ هێنە قەرەبووکرن.
رێڤەبەرێ ناحیا دێرەلۆکێ دیارکر ژی کو د نوکە دا ڤەدیتن بۆ هەرئیک ژ گوندێ مژێ، سپیندارێ، گێرگاش و گەڤنە مژێ دهێتەکرن و گوت ژی، هندەک ژ وان مالان هەتا چل ملیون دیناران وەکو قەرەبو دێ وەرگرن، هندەک ژی کێمتر، رەنگە هەبن پتر ژی، ل دەمێن بهێت دێ قەرەبویا وان هێتەدان.
گیزی د درێژاهیا ئاخفتنێن خو دا دیارکر ژی کو ئەڤە قوناغا دوویێ یا قەرەبوکرنا زیانڤێکەفتێن شەری یە و بەری نوکە خەلکێ گوندێ دەڤەرا نهێلێ هاتینە قەرەبوکرن و گوتژی، بەرنامێ قەرەبوکرنا زیانڤێکەفتێن شەرێ ناڤبری دێ بەردەوام بیت هەتاکو هەتا وەردگرن.
ل سنورێ پارێزگەها دهۆکێ تایبەتی سنورێ قەزا ئامێدیێ زورترین گوند هاتینە چولکرن، زیانێن راستەوخۆ ژی یێن شەری ب خەلکێ چەند گوندان ل سنورێ ناحیا دێرەلۆک شێلادزێ گەهاندیە، زێدەباری کو ددەما بوری دا، ب گورەی زانیاریان نێزیکێ 150 کەس هاتینە شەهیدکرن و بریندارکرن.