ل دووڤ راسپارده‌یێن، مه‌سرور بارزانی، سه‌رۆكێ حكومه‌تا هه‌رێما كوردستانێ ژبۆ پاراستنا ژینگه‌هێ پاقژ راگرتنا جهێن گشتی، ئه‌ڤرۆ، پارێزگارێ دهۆكێ سه‌رپه‌رشتیا كۆمبوونه‌كا تایبه‌ت ل گه‌ل هه‌ر شه‌ش ده‌ڤه‌ردارێن پارێزگه‌ها دهوکێ وریڤه‌به‌رێن په‌یوه‌ندیدار كر و چەند بریار دەرکرن.
پەیامنێرێ وشە دیارکر کو دكۆمبوونێدا باس ل گرنگی یا پاراستنا ژینگه‌هێ و پاقژراگرتنا جاده وكولانێن ناڤ باژێر و گوندان و جهێن گشتی هاته كرن.
د. عەلی تەتەر، پارێزگارێ دهۆكێ، د کۆمبوونێ دا دوپاتكر كۆ ل دووڤ راسپارده‌یێن، مه‌سرور بارزانی، سه‌رۆكێ حكومه‌تا هه‌رێما كوردستانێ دڤێت ل سه‌رئاستێ هه‌موو ده‌ڤه‌رداری و ناوچه‌داری و رێڤه‌به‌ریێن په‌یوه‌ندیدار گرنگی ب پاقژیێ و پاراستنا ژینگه‌هێ بهێته دان و رویێ جوان یێ ده‌ڤه‌رێ کو پاقژی و ژینگەهـ پارێزی بەشەکە ژ کولتوورێ جوانێ وەلاتێ مە باشتر بهێته دیاركرن.
دکومبونێ دا ب هویری گه‌نگه‌شێن تێر وته‌سه‌ل ل سه‌ر بابه‌تی هاتنه‌كرن و چه‌ندین بریار و رێنما هاتنه ده‌ركرن دا ژینگه‌ها ده‌ڤه‌رێ پتر بهێته پاقژكرن و پاراستن.
ب گورەی زانیاریێن وشە، چوار رێنما و بریار هاتینە دەرکرن، دیاركرنا جهێن تایبه‌ت ل سه‌رجادێن سه‌ره‌كی و لاوه‌كی بۆ وێ یه‌كێ خودانێن مه‌زره‌عا و سه‌یرانی گلێشێ خۆ یێ رۆژانه دانه وان جها، كۆمپانیێن راكرنا گلێشی ب ئه‌ركێ خۆ یێ ده‌ستنیشانكری رابن و به‌رده‌وامیێ ب ده‌نه كارێن پاقژكرنێ ل دویف پیڤەر و کوالیتیێن دەستنیشانکری، ده‌زگه‌هێن په‌یوه‌ندیدار به‌رده‌وام دووڤچونا سه‌رپێچكاران بكه‌ن چ ئه‌وبن یێن زیده‌گاڤیا ل سه‌ر ژینگه‌هێ دكه‌ن یان ئه‌وبن یێن گلێشی نه‌دانه جهێن ده‌ستنیشانكری ویێن پێگریێ ب رێنمایا نه‌كه‌ن ل دووڤ یاسای بهێنه سزادان.
دیسان پشتی جهێن تایبه‌ت بۆ دانانا گلێشی دهێنه دیاركرن دڤێت ده‌زگه‌هێن راگه‌هاندنێ و رێڤه‌به‌ریێن په‌روه‌ردێ و فه‌رمانگه‌هێن دی وەکو زانكو و ئێكه‌تیا زانا و ئه‌وقاف و ده‌زگه‌هێن حزبی و رێكخراوێن جه‌ماوه‌ری و ژینگه دوست هشیاریا جڤاكی و هەوەکا نیشتیمانی دناڤ خه‌لكێ ده‌ڤه‌رێ دا به‌لاڤكه‌ن كۆ گرنگیێ ب پاقژیێ و پاراستنا ژینگه‌هی بده‌ن کو ئەرکەکێ ئایینی و نیشتیمانی و مروڤایەتیە.
دوهی ل دهوکێ دناڤ رێورسمێن ڤەکرنا پارکا سەرهلدان دا، مەسروور بارزانی دیارکر کو دڤێت گرنگی ب پاراستنا ژینگەهێ بهێتەدان و خواست ئالیێن شولەژێ ب جدی بابەتی وەربگرن، هەر کەسێ سەرپێچسێ ل سەر ژینگەهێ بکەت و تێکدەت ب گوەی یاسا رەفتار ل گەل بهێتەکرن.