ب مەرەما زێدەکرنا رێژا کەسکاتی و خزمەتکرنا وەڵاتیان ب تایبەتی گەرەکێن باژێرێ دهۆکێ، دەست ب چێکرنا هەشت پارک و باخچەیێن نوو ل باژێرێ دهۆکێ هاتەکرن.
شێروان، ژ سەروکاتیا باژێرڤانیا دهۆکێ بۆ وشە دیارکر کو وان دەست ب چێکرنا پارکەکا گرنگ و قەبارە مەزن کریە و گوت، ل دووڤ راسپاردێن د.عه‌لی ته‌ته‌ر، پارێزگارێ دهۆكێ ژبۆ زێده‌كرنا رێژا كه‌ساكاتیێ ل ناڤ سه‌نته‌رێ باژێرێ دهۆكێ ، تیمێن سه‌روكاتیا باژێرڤانیا دهۆكێ ده‌ست ب چێكرنا پاركه‌كێ مه‌زن ل ناڤ تاخێ ره‌زا كریه ب رووبه‌رێ پاركی 11 هزار مەترێن دوو جاركی، هه‌تا نوكه پرۆژه ب رێژا 8% هاتیه دروستكرن و بریاره پارك ب داران و كه‌سكاتیێ بهێته چاندن و روویه‌كێ دی یێ جوان ب ده‌ته تاخێ ره‌زا ل باژێرێ دهۆکێ.
زێدەتر گوت، ئه‌ڤ پاركه ل گه‌ل حه‌فت پاركێن دی ل سه‌ر بودجا پارێزگه‌ها دهۆكێ ژلایێ تیمێن سه‌رۆكاتیا باژێرڤانیا دهۆكێ ل جهێن جودا جودا ل ناڤ تاخێن باژێرێ دهۆكێ دهێنه چێكرن، ئەڤ پارکە ب رووبەر و قەبارێن جودا ل گەرەک و کولانێن جودا دهێنە چێکرن.
ژبلی پارکا ل سەری هەڤدەم ل رەخ و رویێن چیایێن دەوروبەرێن دهۆکێ ژی دەست ب چاندنا دار و باری و پشتینەیا کەسک کریە داکو رویەکێ جوانتر بدەت دهۆکێ.
بریارە ل رەخ و رویێن سکرێ دهوکێ ژی کورنیشەک بهێتە چیکرن بۆ زێدەکرنا رێژ کەسکاتی و ڤەوژاندنا کەرتێ گەشتیاری ل دهوکێ.
حەفتیا بووری ژی مەسروور بارزانی پارکا سەرهلدان ل دهۆکێ ڤەکر کو لسەر رووبرێ 122 هزار مەترێن دوجا هاتیە چێکرن و 75%ێ ریژا کەسکاتی یە و هزاران دارێن جودا لێ هاتینە چاندن.