سەروکێ لیستا پارتی دیموکراتی کوردستان ل دهۆکێ دیارکر کو ئەوان وەکو پارتی بانگەشا هەلبژارتنێن عیراقێ ل بازنێ پارێزگەها دهۆکێ دەستپیکریە و ئەو دێ هەول و بزاڤان کەن کو ئاریشەیێن کوردستانی ل گەل بەغدا چارەسەر بکەن، وان باوەری هەیە کو جارەکا دی خەلک دێ پارتی هەلبژێرن ڤە.
فەرهاد ئەترۆشی، سەرۆکێ لیستا پارتی ل بازنێ دهوکێ بۆ وشە گوت، پارتی وەکو حزبەکا کوردستانی و عیراقی ژی، رەقەم ئێک بویە بۆ پاراستنا ئەرک و مافێن کوردستانێ و گوت، ئەم هەر ژ نوکە سوزێ ددەینە خەلکێ کوردستانێ کو ب جدی بەرەڤانیێ ل مافێن کوردان بکەین کو د دەستورێ عیراقێ دا هاتی، دڤێت ل عیراقێ هەڤگرتن و هەسەنگی و هەڤپشکی ل بهێتە بجهئینان داکو عیراقەکا ئێکگرتی دروست بیت و ئەرک و مافێن هەموو پیکهاتەیێن عیراقێ پاراستی بن، بەلێ مخابن ئەڤ یەک ل عیراقێ هاتیە تێکدان و بجهنەئینایە، لەوا بەردەوام ئاریشە دروست بن.
زێدەتر گوت، داخوازێ ل هەموو بەربژار و لایەنیرێن پارتی دکەین ک ب جدی دبانگەشا هەلبژارتنان دا ب رەنگەکێ شارستانی و مەدەنی کارێن خۆ بکەن و نەبنە ئەگەرێ تێکدانێ و نەئارامیا دل و دەرونێ خەلکی و باژێری.
ناڤبری دیارکر ژی کو ئاریشەیا کوردان ل کوردستانێ نینە، بەلکو ل گەل عیرقێ یە و گوت ژی، دڤێت حزب و ئالیێن سیاسیێن کوردستانێ هەڤگرتی بن ل بەغدا، ئاسایە کو ئاریشە و جیاوازی ل کوردستانێ هەبیت، وەکو پارتی دێ ب جدی کار ل سەر ئەرک و مافێن کوردان ل بەغدا کەین وەکو چەوا پێشتر کارکریە بو هندێ ئەرک و مافێن کوردان ل یاسا و دەستورێ عیراقێ دا هاتین ب پارێزن، مە باوەریەکا تمام ب خەلکێ پارێزگەها دهۆکێ و ئیدارا سەربەخۆیا زاخۆ هەیە کو دێ دەنگی دەنە پارتی و جارەکا دی پارتی هەلبژێرن، چونکی خەلکێ مە گەهشتیە وێ باوەریێ تنێ پارتی یە بشێت ماف و دەستکەفت و قەوارێ هەرێما کوردسانێ بپارێزیت، ئاریشەیێن سنوری و مادا سەد و چل و ئاریشا مووچەی و هەموو ئاریشەیێن دی چارەسەر کەت.
ل سنورێ بازنێ پارێزگەها دهوکێ 11 کورسی بۆ حزب و ئالیێن سیاسی هاتینە دیارکرن و کورسیەک ژی بو کوتا هاتیە دیارکرن، 39 بەربژارێن زەلام و 20 بەربژارێن ژن هەڤرکیێ ل سەر دەستڤەئینانا کورسیان دکەن.