زێدەباری کو هەتا نوکە بانگەشا هەلبژاردنان ل پارێزگەها دهۆکێ ب خاڤی ب رێڤەدچیت، بەلێ بەرپرسەکێ پارتی ل دهۆکێ ددەت دیارکرن کو پارتی ژ کوما 11 کورسیان دێ 9 کورسیان ئینن و هەڤرکیێ بۆ کورسیا 10ێ کەن.
د. نەوزاد عەبدوللا، بەرپرسێ لقێ ئێکێ پارتی ل دهوکێ دیارکر کو ئەوان بانگەشا هەلبژارتنان ل بازنێ دهوکێ دەستپێکریە و بۆ "وشە" گوت، ب فەرمی مە بەربژاێن خۆ ل دهۆک و زاخۆ بۆ خەلکی و جەماوەرێ پارتی دانە نیاسین و چوینە دناڤ کەشێ هەلبژارتنان دا و کار دکەین بۆ هندێ پەیاما خۆ بگەهینینە دەنگدەران ب گورەی ئەوان دروشم و خال و هێلێن سەرەکی یێن پارتی بۆ هەلبژارتنێن پەرلەمانێ عیراقێ دانای کو ئەو ژی هەڤسەنگی و هەڤپشکی و لهەڤهاتنە.
زێدەت گوت، ب گورەی خواندنێن مە و ئەو دەنگێن مە د هەلبژارتنێن ل پەرلەمانێ کوردستانێ ل سنورێ پارێزگەها دهۆک و ئیدارا سەربەخویا زاخۆ دەستخوڤە ئینایی، پارتی ل بازنا دهوکێ دێ هەشت کورسیو نیڤ یان 9 کورسیان دەستخوڤە ئینیت، هەڤرکیێ ژی بۆ کورسیا 10ێ کەت، هەموو ئالیێن دی یێن سیاسی دێ کورسیەکێ یان دوو کورسیان دەستخوڤە ئینن.
بەرپرسێ لقێ ئێکێ پارتی دیموکراتی کوردستان دیارکر ژی کو د هەلبژارتنێن پەرلەمانێ کوردستانێ دا پارتی 410 هزار دەنگ دەستخوفە ئینان و نێزیکێ 50 هزار دەنگێن پارتی ژی ژبەر چەند ئەگەرێن تەکنیکی پوچەلبوون و گوت ژی، مە باوەریەکا تمام ب خەلکێ پارێزگەها دهوکێ و ئیدارا زاخۆ هەیە وەکو هەرجار دێ پارتی هەلبژێرن و دەنگی خۆ دەنە لێستا پارتی و بارزانی، ژبەرکو خەلکێ مە گەهشتیە وێ باوەریێ هەر تنێ پارتی یە دێ شێت خزمەتا وان کەت و ماف و دەستکەفتێن کوردستانێ پارێزیت و بەرەڤانیێ لێ کەت.
ل سنورێ بازنێ پارێزگەها دهوکێ 11 کورسی بۆ حزب و ئالیێن سیاسی هاتینە دیارکرن و کورسیەک ژی بو کوتا هاتیە دیارکرن، 39 بەربژارێن زەلام و 20 بەربژارێن ژن هەڤرکیێ ل سەر دەستڤەئینانا کورسیان دکەن.