نێچیرڤان بارزانی سەرۆكی هەرێمی كوردستان، پێشوازیی لە بیرۆل ئەكیجی، پارێزگاری شرنەخی توركیا و شاندێكی یاوەری كرد كە لە سەرۆكی شارەوانی و سەرۆكی ژووری بازرگانیی شرنەخ و سەرۆكی ژووری بازرگانیی جزیر پێكهاتبوو.
لە دیدارێكدا كە پارێزگاری هەولێر و كونسوڵی گشتیی توركیا لە هەرێمی كوردستان ئامادەی بوون، پێوەندییەكانی توركیا لەگەڵ عێراق و هەرێمی كوردستان و ئاڵوگۆڕی بازرگانی و چۆنیەتیی برەودان بە چالاكیی ئابووری و زانكۆیی و كولتووریی نێوانیان خرانە بەر باس.
هەردوولا داكۆكییان لە خواستی دوولایەنە بۆ برەودانی زیاتر بە هاریكاریی هاوبەش و فراوانكردنی بوارەكانی بازرگانی و هاتوچۆ و گەشتیاری لەنێوان هەرێمی كوردستان و توركیادا كرد. لەمبارەیەوە باس لە ئاستی پەیوەندییەكانی شرنەخ لەگەڵ هەولێر و پارێزگاكانی هەرێمی كوردستان كرا.
كاریگەریی پرۆسەی ئاشتی لەسەر بەرەوپێشچوونی ناوچەكە، فڕۆكەخانەی شرنەخ كە بەهۆی نزیكییەوە لە سنوور، خزمەت بە گەشتیارانی هەرێمی كوردستانیش دەكات، لایەنێكی تری دیدارەكە بوو.