ددەما 48 دەمژمێرێن بوری دا، ب ئەگەرێ بارانێن بهێز، لەهی ل چەند جهێن جودا ل ئیدارا سەربەخویا زاخۆ دروست بوون و زیان ب چەند مالا گەهاندن، ب تایبەتی ل سنورێ ناحیا رزگاری، هەموو ئەو زیانڤێکەفتی دێ هێنە قەرەبووکرن.
ئیدریس عەبدوللا، ژ سەروکاتیا باژێرڤڵنیا ئیبراهیم خەلیل ل سنورێ ناحیا رزگاری ل ئیدارا سەربەخۆیا زاخۆ د دخوانییەکێ دا دیارکر کو ب ئەگەرێ باران و لەهیان زیان ب چەند مال و بازاڕان کەفتیە و بۆ "وشە" گوت، ب ئەگەرێ لەهیان یێن دوو روژێن بوری زیان ب ژمارەکا مال و مولکێن وەلاتیان و بازاڕ و ترومبێلا کەفتیە و زیان گەهاندیە وان، ب تایبەتی ل گوندان و وان مالێن دکەڤنە جهێن نزم.
زێدەتر گوت، لژنەک ژلایێ ئیدارا سەربەخویا زاخۆ و قایمقامیەت و بەرەڤانیا باژێری و ئالیێن دی یێن شولەژێ پێکهاتیە و ژ نێزیک سەرەدانا جهێن زیانڤێکەفتی کریە ڤەدیتن بۆ وان جهان کریە، ب گورەی شیانێن بەردەست هەموو ئەو جهە دێ هێنە قەڕەبووکرن.
ناڤبری دیارکر ژی کو ل دەمێ لەهیان ژی ئەوان ب هەموو سازیێن خوڤە ب هانا خەلکێ زیانڤێکەفتی چون بۆ هندێ زیانێن وان بهێنە کێمکرن و سەر و مالێ وان یێ پاراستی بیت و گوتژی، تیمێن مە بۆ هانا چونا وەلاتیان و پاقژکرنا جهێن زیانڤێکەفتی بەردەوامن و یا دشیاندابیت دێ خزمەتا وەلاتیان کەین.
پرانیا زیانێن لەهیان ل سنورێ ئیدارا سەربەخۆیا زاخۆ ل کۆمەلگەها چەمکۆرک، گوندێ خێلەخ، گوندێ باکرمان و سەنتەرێ ناحیا رزگاری دروستبوینە.