مەزڵووم عەبدی فەرماندەی گشتیی هێزەكانی سووریای دیموكرات (هەسەدە) لە گوتارەكەیدا لە شەشەمین كۆڕبەندی ئاشتی و ئاسایشی ڕۆژهەڵاتی ناوەڕاست (مێپس 2025) لە دهۆك ڕای گەیاند، "ئەو ڕێككەوتنەی لە 10ـی ئادار لەگەڵ ئەحمەد شەرع واژوومان كرد، ڕێگریی لە زۆر رووداوی مەترسیدار كرد.
عەبدی ئاماژەی بەوە كرد، ئێمە لە ناو شەڕێكی سەختدا بووین و بەهۆی ڕێككەوتنەوەكە وەستا. هەروەها ڕێگریی لە دابەشبوونی سووریا و تۆڵەسەندنەوە لە نێوان پێكهاتەكانی هەموو پارێزگاكانی وڵاتەكەدا كرد.
فەرماندە كوردەكە ئەوەشی گوت، بە درێژایی 100 ساڵی ڕابردوو لە سووریا باسی پرسی كورد نەكرابوو، بەڵام لەو ڕێككەوتنەدا باسی پرسەكە كراوە و دووپات لەوە كراوەتەوە، پێویستە مافەكانی گەلی كورد و هەموو پێكهاتەكان، لە چوارچێوەی دەستووری نوێی سووریادا دەستەبەر بكرێن."
هاوكات گوتی، دوای هەر شەڕێكیش دەبێت دیالۆگ و ئاشتی بێتە ئارا، هەموو پرسەكان بەدیالۆگ چارەسەر دەكرێن، لە شەڕیشدا چەند سەركەوتوو بیت، هەر دەبێت بەدیالۆگ كۆتایی پێ بێنێت، لە سەردەمی بەشار ئەسەد دیالۆگ نەدەكرا و باوەڕیان بە گفتوگۆ نەبوو، بۆیە هیچ شتێك چارەسەر نەكرا.
عەبدی باسی لەوەش كرد، ئەمڕۆ ئیتر پێویستمان بە شەڕ نەماوە، ئێمە گفتوگۆمان هەڵبژاردووە، هیوادارین شەڕ رێگەیەك نەبێت بیسەپێنن بەسەرماندا، شەڕ بۆ كەس باش نییە.
مەزڵووم عەبدی گوتیشی، "پێمان وایە ناكرێت سووریا بگەڕێتەوە بۆ دەوڵەتێكی مەركەزیی هاوشێوەی سەردەمی ڕژێمی بەعس، دوای 15 ساڵ لە شەڕ لە ناو سووریادا، پێویستە سووریایەكی لامەركەزی هەبێت و هەموو هەرێمێك بتوانێت خۆی بەڕێوە ببات.
"ڕاستییەك دروست بووە و ناتوانین نكۆڵی لێ بكەین، ئیتر سووریا سووریای پێشوو نییە، پێویستە هەموو كەسێك ئەم ڕاستییە قبووڵ بكات و لەم چوارچێوەیەدا هەنگاو بنێت."
بە گوتەی عەبدی، پرسی كورد بۆ 100 ساڵە لە سووریا ئینكار دەكرا، ئێستە هەلومەرجەكە جیایە و شتەكان گۆڕاون، بۆیە نابێت بەعەقڵی پێشوو مامەڵە لەگەڵ كێشەی كورد بكرێت، دەبێت لە سووریای نوێ چارەسەری هەموو كێشەكانی كورد و ئەوانی تریش بكرێت.
مەزڵووم باسی لەوە كرد، هێشتا رێككەوتنەكەمان لەگەڵ سووریا جێبەجێ نەكراوە و كێشەی گەڕەكەكانی حەلەبمان هەیە، ئاوارەكانی عەفرین نەگەڕاونەتەوە و چەندان پرسی تر چارەسەر نەكراون، بەڵام ئەگەر ئیرادەیەكی سیاسیی خورت هەبێت، رێككەوتنەكە دێتە جێبەجێكردن. ئێمەش وەك هەسەدە و وەك هێزی كورد ئەو ئیرادەیمان هەیە پرسەكان بەئاشتی چارەسەر ببێت، بۆ ئەمەش بانگێشتی حكوومەتی شام دەكەین، بێن چارەسەری كێشەكان بكەین و بەئاشتی بگەین.
هاوكات گوتی، چارەسەركردنی كێشەی كورد لە رۆژهەڵاتی ناوین ئارامی بۆ ناوچەكە دێنێت، چارەسەركردنی كێشەی كوردیش لە سووریا ئارامی بۆ سووریا دێنێت، بۆیە ئەگەر بڕیارە ئارامی بۆ سووریا بگەڕێتەوە، دەبێت كێشەی كورد چارەسەر بكرێت.
لەبارەی بابەتی هێزەكانی هەسەدە عەبدی گوتی، رێككەوتنمان هەیە، بەڵام وردەكاریی زۆر ماوە و چاوەڕێین بگەینە ئەنجام، هەندێك مژاری ئیداریش هەن هێشتا گفتوگۆیان لەسەر دەكەن و هێشتا چارەسەریان دیار نییە.
"ئیتر سووریا مومكین نییە بگەڕێتەوە پێشتر و بەهیچ شێوەیەك مەركەزییەتمان ناوێت، دەبێت هەرێمێكی خۆمان لە سووریا هەبێت، بۆ ئەوەش هەزاران شەهیدمان داوە و شۆڕشمان كردووە و چەندان جەرگی دایك و باوكمان سووتاند". عەبدی وای گوت.
مەزڵووم عەبدی گوتیشی، بڕیار بوو تا كۆتایی ساڵ ئەو رێككەوتنە بێتە چارەسەركردن و هێشتا كات ماوە و چاوەڕێ دەكەین، بەڵام ئێمە سوورین لەسەر پاراستنی مافەكانی نەتەوەكەمان، گەلی كورد لە باشووری كوردستان هێزی خۆی وەك پێشمەرگە هەیە، گەلی ئێمە لە رۆژئاوای كوردستان لەگەڵ نەتەوەكانی تر هێزێكی بەرگرییان هەیە و ئەمەریكا هاوكاریمان دەكات، ئەم هێزە رۆڵی گەورەی لە پاراستنی رۆژئاوای كوردستان هەیە.
عەبدی لەبارەی باكوری كوردستان گوتی، لەوێ پێڤاژۆیەكی ئاشتی هەیە و رێبەر ئاپۆ و توركیا خەریكن و ئەگەر سەر بگرێت، بۆ ناوچەكە بەخێر دەكەوێتەوە و ئێمەش پشتگیریی دەكەین.
"باشووری كوردستان چ هەولێر و چ سلێمانی، ئەمە 15 ساڵە پشتگیریی رۆژئاوای كوردستان دەكەن، ئەمڕۆ داوا دەكەین تەواوی هێزەكان، بەتایبەت سەرۆك بارزانی هەرچی لە توانایاندایە بۆ پێڤاژۆی باكوری كوردستان و رۆژئاوای كوردستان بكەن، تا ئەوانیش وەك باشوور بەمافەكانیان دەگەن.
لە كۆتایشدا داوای لە هەمو كورد لە هەر چوار پارچەكەی كوردستان كرد، لە رۆژئاوای كوردستان یارمەتیدەر بن، بەتایبەت لە بواری ئابووری تا رۆژئاوای كوردستان ببووژێتەوە و كێشەكانی لەو بوارەشدا تێپەڕێنێت.