كۆمپانیای دانەغاز بەرهەمهێنانی لە كێڵگەی گازی كۆرمۆر لە سنووری قەزای چەمچەماڵ لە پارێزگای سلێمانی راگەیاند.
ئەمڕۆ چوارشەم سێی كانوونی یەكەم، لە راگەیەنراوێكی كۆمپانیای دانەغازدا هاتووە، لە دوای هێرشەكەی رۆژی چوارشەمی رابردوو 26-11-2025، ئێستە ئاستی بەرهەمهێنان ئاسایی بووەتەوە.
دانەغاز باس لەوە دەكات، دوای توندكردنی رێوشوێنە تەناهییەكان لەلایەن حكوومەتی هەرێمی كوردستان و دەسەڵاتە فیدراڵییەكان، بەرهەمهێنانی غازیان دەستی پێ كردووەتەوە.
باس لەوەش دەكات، لەگەڵ هاوبەشەكانیان پابەندن بە سەلامەتیی كارمەندانیان و دابینكردنی كارەبا و غازی ئێڵ پی جی بۆ خەڵكی هەرێمی كوردستان و عێراق.
هێرشەكەی رۆژی چوارشەمی رابردووی سەر كۆرمۆر، بووە هۆی ئاگركەوتنەوە لە كۆگەیەكی سەرەكی و راوەستانی بەرهەمهێنانی غاز، ئەمەیش بووە هۆی لەدەستدانی نزیكەی 80%ی بەرهەمهێنانی كارەبای هەرێمی كوردستان.