لەكاتێكدا خەڵكی بازیان بێزارن لە كارگەی چیمەنتۆیەكە و بە گوێرەی قسەی شارەزایانیش هۆكاری یەكەمی بڵاوكردنەوەی نەخۆشی شێرپەنجەیە، بەڵام ئیدارەی گشتیی یەكێتی ئێستە دەستی بەسەر گوندێكی تردا گرتووە و دەیكاتە كارگەی چیمەنتۆ.
بەپێی زانیارییەكانی "وشە" ئیدارەی گشتیی یەكێتی لە بازیان - گوندی كانی شایە كارگەیەكی چیمەنتۆی دروست كردووە.
كارگەكە بەسەرپەرشتی هەریەكە لە "وەرزێر یاسین قادر بەرزنجی و هاوڕێ دارۆی شێخ نوری و شێخ ئەحمەد نۆكان"ە و دەكەوێتە نزیك كارگەی چیمەنتۆی بازیان لە گوندی (كانی شایە) كە ئێستە هێزێكی تەناهیی لە نزیك كارگەكە دانراون.
بە گوێرەی بەڵگەنامەی لای "وشە" ڕووبەری كارگەكە لە نزیكەی 60 دۆنم زەوی پێكدێت و ناوەڕاستی مانگی ئابی ئەمساڵ ژمارەیەك لە هاووڵاتییانی ناوچەكە گردبوونەوە بەهۆی ئەوەی بەشێك لە گوندەكەیان دەستی بەسەردا گیراوە و خەڵكی گوندەكە داواكاریی هەلی كار و قەرەبووی ژینگە دەدەن.
پێشتر خەڵكی ئەوسنوورە دژی كارگەی چیمەنتۆی بازیانیش بوون، چونكە بە گوێرەی قسەی شارەزایان هۆكارە بۆ بڵاو كردنەوەی شێرپەنجە.