دو روژێن بوری ژئەگەرێ بارانێ بهێز، لەهی و لافاو ل سەنتەرێ شێخان دروست بون و زیان گەهاندن چەندین مال و ترومبێلا، شارەوانیا شێخان ژی دیارکر کو هەموو زیانڤێکەفتی دێ هێنە قەرەبوکرن.
خالد نەرمو، سەروکێ باژێرڤانیا شێخان بۆ وشە گوت، ژ ئەگەرێ بارانێن بهێز یێن دوو روژێن بوری، لەهی و لافاو ل سەنتەرێ قەزا شێخان دروست بوون ب تایبەتی ل گەرەکا مشەختی و زیانێن زور ب وەلاتیان و جهێن گشتی کەفتن.
زێدەتر گوت، ل گەرەکا مشەختی زیانێن زور یێن مادی ب 12 مالان کەفتیە، ل گەل 12 ترومبێلا، دیسان زیان ب چەند مالان ژی کەفتیە ل کەمپا شێخان یا ئاوارێن شنگالێ، ب بریارا پارێزگارێ دهۆکێ هەموو ئەو زیانڤێکەفتی ب هەڤکاری ل گەل دەزگەهێ خێرخوازی بارزانی، دێ هێنە قەرەبوکرن و هاریکاریا وان هێتەکرن داکو جارەکا دی ڤەگەڕن ڤە ناڤ مالێن خۆ و ژیانا وان ئاسایی ببیت ڤە.
سەرۆکێ باژێرڤانیا شێخان دیارکر ژی کو هەموو ئەو کولانێن زیان گەهشتیێ ل شێخان ژلایێ تیمێن باژێرڤانیا شێخان و ئالیێن شولەژێ هاتینە پاقژکرن و گوتژی، ددەما چەند دەمژمێرێن کێم دا پتری 50ملم باران پێکڤە ل شێخان بارین و بویە ئەگەرێ دروستبونا لەهی و لافاوان و زیان گەهاندە وەلاتیان، دیسان ژبلی زیانێن کەسی هەڤدەم زیان ب مولک و جهێن گشتی ژی کەفتیە و ئەو ژی دێ هێنە چێکرن و پاقژکرن ڤە.
شێخان ئێک ژ قەزایێن مەزنە ل پارێزگەها دهۆکێ و پتری 200 هزار کەس تێدا دژین، دکەڤیتە دەڤەرەکا نیمچە چیایی ل روژهەلاتێ باژێرێ دهوکێ.