بە سەرپەرشتی مەسروور بارزانی سەرۆك وەزیرانی كوردستان و ئامادەبوونی قوباد تاڵەبانی جێگری سەرۆك وەزیران، ئەنجوومەنی وەزیرانی هەرێمی كوردستان، كۆ بووەوە .
لە بڕگەی یەكەمی كۆبوونەوەدا، دارا ڕەشید وەزیری پلاندانان، ڕاپۆرتێكی تێروتەسەلی بە داتا و ژمارەی ورد لەسەر سەرژمێریی دانیشتووانی عێراق خستەڕوو كە مانگی 11ی ساڵی 2024 ئەنجامدرا و بەگوێرەی ڕاگەیەندراوی فەرمی ئەنجامی سەرژمێرییەكە، ڕێژەی دانیشتووانی هەرێمی كوردستان (جگە لە ناوچە كوردستانییەكانی دەرەوەی هەرێم) بە 14.1٪ دەستنیشان كرا.
ئەم سەرژمێرییەش، پێشوەختە لە چوارچێوەی ڕێككەوتنی نێوان هەردوولا ئەنجامدرا كە بە چەند بڕیارێكی ئەنجوومەنی وەزیرانی فیدراڵ پەسەند كرا و حكوومەتی فیدراڵ پابەند دەكات بە جێبەجێكردنی ڕێككەوتننامە و بڕیارەكانی خودی ئەنجوومەنی وەزیرانی فیدراڵ، كە بەداخەوە وەزارەتی پلاندانانی فیدراڵ، لە دەرەوەی ئەو بڕیارانە و پێچەوانەی ڕێككەوتنی هاوبەشی هەردوو حكوومەتی هەرێم و فیدراڵ، ڕەفتاری كردووە لەگەڵ دەرئەنجامی فەرمی سەرژمێرییەكە، كە ئەمەش كاریگەریی نەرێنیی دەبێت لەسەر شایستەكانی هەرێمی كوردستان و پێویستی بە ڕێكاری بەپەلە هەیە بۆ ڕاستكردنەوەی.
دوای گفتوگۆ و ڕاگۆڕینەوە و خستنەڕووی چەند سەرنج و تێبینیەك لەسەر بابەتی سەرژمێریی و لێكەوتەكانی، ئەنجوومەنی وەزیران، وێرای دەستخۆشی لە وەزیری پلاندانان بۆ ئامادەكردنی ڕاپۆرتەكە، دەستكاریكردنی ڕێژەی دانیشتووانی هەرێمی كوردستانیش لەلایەن وەزارەتی پلاندانانی فیدراڵەوە ڕەت دەكاتەوە و هەنگاوی پێویستیش دەگرێتە بەر بۆ ڕاستكردنەوەی هەڵە و دەستكاریكردنەكان و داواش لە حكوومەتی فیدراڵ دەكات پابەند بێت بە ڕێككەوتنە هاوبەشەكان و ئەنجامی فەرمی ڕاگەیەنراوی سەرژمێرییەكە كە ڕێژەی هەرێمی كوردستان %14.1ە .
لە هەمان كاتدا، ئەنجوومەنی وەزیران داوا لە سەرۆكایەتی كۆمار و فراكسیۆنە كوردستانییەكانی ئەنجوومەنی نوێنەرانی عێراق دەكات، وەك ئەركێكی دەستووریی و یاسایی و نیشتمانیی خۆیان ، بەرگری لە مافەكانی خەڵكی كوردستان بكەن و ڕێگە نەدەن دەستكاری ئەنجامەكانی ئەم سەرژمێرییە بكرێت و نابێت قبوڵی بكەن ڕێژەی دانیشتووانی هەرێم لە ڕێژەی فەرمی ڕاگەیەنراوی خۆی كەم بكرێتەوە.
ئەنجوومەنی وەزیرانی هەرێمی كوردستان، هەروەها داوا لە حكوومەتی فیدراڵ دەكات پابەند بێت بە ئەنجامی سەرژمێرییەكە و ڕێژەی دانیشتووانی هەرێم كە %14.1ە ، بكرێتە بنەما بۆ دەستنیشانكردنی بەشە بودجەی هەرێمی كوردستان و شایستە دەستوورییەكانی.
پاشان لە بڕگەی دووەمی كارنامەكە، گفتوگۆ لەبارەی بابەتی پەسەندكردنی كۆنووسی لەیەكترگەیشتنی هاوبەشی نێوان وەزارەتی كاروباری شەهیدان و ئەنفالكراوان و دەزگای زیندانیانی سیاسی عێراق كرا تایبەت بە یەكخستنی ئیمتیازات و شایستە داراییەكانی زیندانییان و گیراوانی سیاسی لە هەرێمی كوردستان لەگەڵ هاوتاكانیان لە ناوچەكانی تری عێراق، پشتبەست بە مادەی 132ی دەستوور و یاسای ژمارە 10ی ساڵی 2025 ی هەمواری یاسای زیندانییانی سیاسیی عێراق، لەمبارەیەوە عەبدوڵا حاجی مەحموود وەزیری كاروباری شەهیدان و ئەنفالكراوان، پوختەیەكی بابەتەكەی بۆ ئەنجوومەنی وەزیران خستەڕوو و دواتریش ئامانج ڕەحیم سكرتێری ئەنجوومەنی وەزیران وردەكاریی دەستووریی و قانونی و لایەنی دارایی بابەتەكەی خستەڕوو.
ئەنجوومەنی وەزیران پشتگیریی لەهەر هەنگاوێك دەكات بە ئاراستەی خزمەتكردنی زیاتری زیندانییان و ڕاگیراوانی سیاسیی لە هەرێمی كوردستان و سوودمەندبوونیان لە هەمان شایستەی دارایی و ئیمتیازاتی هاوتاكانیان لە ناوچەكانی دیكەی عێراق، لە هەمانكاتدا دووپاتكرایەوە لە ڕەچاوكردنی تایبەتمەندییە دەستوورییەكانی هەرێمی كوردستان و داڕشتنی میكانیزمیی پێویست بۆ زامنكردنی خەرجكردنی ئەو شایستە داراییانە بۆ زیندانیان و گیراوانی سیاسیی كە بە گوێرەی مادەی 132 ی دەستوور، ئەرك و بەرپرسیارێتی دەستووریی حكوومەتی فیدڕاڵیە بە یەك چاو سەیری هەموو زیندانیانی سیاسیی بكات لە سەرتاسەری عێراق بە هەرێمی كوردستانیشەوە، بۆ ئەم مەبەستە، وەزارەتی كاروباری شەهیدان و ئەنفالكراوان ڕاسپێردرا كە درێژە بە گفتوگۆ و كۆبوونەوەكانیان لەگەڵ دەزگای زیندانییانی سیاسی عێراق بدەن بۆ دەستنیشانكردنی میكانیزم و چوارچێوەی ڕوون و دیار بۆ جێبەجێكردنی ئەم بابەتە بە ڕەچاوكردنی ئەو سەرنج و تێبینیانەی لە كۆبونەوەكە خرانەڕوو.